Lajan poi artad sha kaba ïabeit bad ki Shipai ban pynïaid kali biang na Happy Valley sha Mawshabuit ong u bah Prestone

Shillong, Rymphang 24 : U Symbud Myntri Rangbah ba khmih ia ka Tnad PWD, u Bah Prestone Tynsong ula pyntip ha ïing Dorbar Thaw Aiñ ba ka jingïapynbeit ïa ka jingïakajia halor ka jaka ba 600 meter jongka surok Happy Valley-Mawshbuit kala jan poi shaba ïabeit bad Shipai khnang ban ïoh pynïaid kali biang na Happy Valley sha Mawshabuit.
“Nga kwah ban pyntip ïa ka ïing Dorbar ba ka jingïapynbeit ka la jan poi sha kaba kut. Hynnin ka sngi, u Myntri Rangbah ka Jylla ula khot ïa ka jingïalang ha kaba ki bor khmih ka GTC bad ki Ophisar ka Tnad Defence bad ki Ophisar ka Sorkar Jylla kila ïashim bynta. Nga sngewkmen ban pyntip ba ha kane ka jingïalang, ki bor shipai ki la mynjur ban nym pynthut lane pynsangeh ïa ka jingïaid ki kali kiba leit ne mih na shnong Mawshbuit” ong u Bah Prestone haba jubab ïa ka jingkylli ba la wanrah da u MLA ka Mawryngkneng Bah Heaving Stone Kharpran.
“Shen ngin sa ïoh ïa ki mat ba ïakren jong ka jingïalang bad hadien ba la ïasoi, yn sa pynmih ïa ka jing bthah ba donkam sha ka bor district ban pynthikna ba ym dei ban pynthut ïa ka leit ka wan ki kali na kane ka Shnong” ula bynrap.
U Bah Prestone u pyntip ba ki bor District bad ka Directorate of Records kin sa leh sorjamin biang ïa ka jaka na ka bynta ban shna ïa ka surok sha Mawshbuit.
“Kumba nga la dep ong ba ki dulir jaka ki la don. Hynnin ruh ngi lah rai ban leh sorjamin biang khnang ban pynthikna ba baroh kin ïashai lut halor kane ka kam. Ngi la bthah ïa ka bor district bad ka Tnad Land Record and Survey ba kin leh sorjamin ba bniah bad ngin sa ïa peit kumno ka long”.
Kat kum ka jingong jong u, ka jingpynbna ïa kane ka bynta jong ka surok ka shong ha ki bor shipai.
U Bah Prestone u pyntip ruh ba ka District Collection kan sa pynlong ïa ka jingïajurip lang bad ki bor shipai halor ka jingshna ïa ka jingkieng ha Wah Umkhen hadien ka jingpyntip ba pynthut ki shipai.
“Hooid ngi la ioh jingtip halor kane ka jingjia bad sa shisien kane ka jaka namar katto katne ki bynta jong ka jaka ka hap haka jingkhmih ki shipai” ong u Bah Prestone.
Halor ka jingïakam trai ïa ka jaka, u Symbud Myntri Rangbah ula ong “ïa ki dulir khyndew jong ki bor shipai yn sa wanrah hapoh ka ïing Dorbar bad nga kyrmen ba ka jingshai kan sa mih na kine ki kot”.
U Bah Prestone u bynrap ba ha ka jingïalang ba long mynshem snem, ula kren shai sha ki nongshong shnong ba ka jingkam trai ia ka jaka ka dei ka kam ka bym lah ban long, hynrei ula kular ba ka jingïaid jong ki kali kam dei ban shah ktah la ka dei kiba mih ne leit sha shnong Mawshabuit”.