Shillong, Rymphang 10: U Symbud Myntri Rangbah ba khmih ïa ka tnat Urban Affairs u Ma Sniawbhalang Dhar u la iathuh ba ki don katto katne ki Project ha sor Shillong kiba la jan dep bad la khmih lynti ba yn plie paidbah noh hadien ka mang tyngka. ïa kiba ym pat dep ruh ka kam ka la ïaid shaid shaid bad tang shu dep yn sa plie noh ïa ki bad lehse hapoh u snem 2027 la lah ban pyndep bad plie paidbah ïa baroh ki projek.
“Ka jingpyntrei ïa kiba bun tylli ki Project ki la ïaid shakhmat ha man la ki jaka” ong u Ma Sniawbhalang haba pynpaw ïa ka jingkyrmen ba ïa ki Project yn pyndep haka por bala buh.
U Ma Sniawbhalang u la kdew ba ka Polo Shopping Complex ka la dep bad la dep ruh ban plie paidbah, katba ïa ka MTC ha Khyndai Lad la khmih lynti ban plie paidbah noh ha u bnai Jymmang ne Jylliew.
U la pynpaw ruh ba ka jingpyntrei ka dang ïaid shakhmat ïa ka New Secretariat bad katto katne ki jaka ïeng kali ba la khmih lynti ban plie hadien u bnai Lber.
“Nga tharai hadien u bnai Lber, yn sa plie ïa ki bun tylli ki jaka pynïeng kali” u la ong.
