Lait thaw u samla na ka jingshah lute pisa ha ki kynhun ‘nonglute’ hadien ba dep sei pisa na Bank

Nongpoh, Jylliew 23: Ha kawei ka jingjia, u wei u samla u la lait thaw na ka jingshah lute bad shah knieh ka pla pisa jong u ha ki briew ki bym lah ithuh durkhmat hadien ba u la dep sei pisa bad mih napoh ka State Bank of India kaba don ha Amjok, Byrnihat,
Kane ka jingjia ka la jia mynta ka sngi haka por 11:40 eiei mynstep ha kaba utei u samla bala tip kyrteng kum u Sahil Jaman Passah naka shnong Amjok u la leit sha ka State Bank of India ban sei pisa, hynrei hadien ba u la mih na katei ka bank katba u dang ïaid lynti, la wan mih kynsan kawei ka thuk thuk Pulsar 220 kaba don ïa u number AS 13 M 9065 ba la shong da arngut ki briew bad ki la knieh beit ïa ka pla pisa kaba u bat ha kti hynrei donbok ba u la ioh ban bat skhem ïaka pla bad kim shym la ioh satia haduh ba un da ur ha madan bad mong ka kti.
Hadien ba u tei u samla u la ïohi ïa katei ka thuk thuk, u la pyrshang ban pan jingïarap na ki paralok ban kthong ïa katei ka thuk thuk bad dei hadien ba poi ha ka shnong 15 mer ki la lap ïa katei ka thuk thuk bad ban ïoh kem da ki paralok jong u ïa u wei u ba la shong ha kane ka bike katba u wei u la ïoh phet noh da ka jingïarap jong ki arngut ki briew kiba la ñiah da ka Bike Domineer kaba la phet krad syndon na katei ka jaka.
Hadien ba la iohkem ïa u tei u briew naka liang ki paidbah kila bat ruh ïa katei ka thuk thuk kila leit ban aiti noh haki pulit ka Byrnihat Police Outpost ban leh ïa kaba donkam bad naka liang utei u samla u la ujor ruh da ka ejahar pyrshah ïa kitei ki nonglute khnang ba ki pulit kin pynlong ka jingtohkit bad ban ioh kem shuh shuh ïa kitei kiwei pat kiba lait phet.
La ong ruh ba kitei ki kynhun Gang ki dei kiba ju don ha katei ka jaka bad kum kine ki jingjia kim dei shuh ki jingjia ba nyngkong hynrei la bunsien ba ki paidbah kila shah lute pisa hadien ba ki mih na Bank ha kaba wat ki bor shnong kila dep ruh ban pynsngew sha ki bor district ban pynjur ka jingpahara ha katei ka thain ba bun ki Bank ban lait na kum kitei ki jingshah lute.