Lait thaw u rangbah ka shnong Lympluh na ka jingïap naba shna kynnoh leh sniew

Shillong, Nailur, 29: Uwei u rangbah uba la don kumba 72 snem ka rta ïa uba la tip kyrteng kum u Bah Spenri Kharmyndai na ka shnong Lympluh, kaba dang hap hapoh ka Hima Nongspung, East Khasi Hills District u la lait thaw na ka jingïap hadien ba u la shah thang da u narsaw, shah theh da ka umthnam bad shah dung da u nar pin ha ki briew kiba shong basah ha ka shnong Lawkhla hadien ba la kynnoh ba une u rangbah u dei uba donkti ban leh sniew ïa kawei ka longiing longsem kaba dei na ka shnong Lawkhla kaba jngai kumba shiteng kynta eiei na ka shnong Lympluh.
Katkum ka jingïathuh jong u Bah Spenri uba dang dang don mynta hapdeng ka jingshah sumar ha Shillong Civil Hospital ha ka jingïakren bad u nongthoh khubor, kane ka la jia ha ka 27 tarik u Nailur, 2022 ha ka por kumba 12:00 baje shiteng synnia katba ka iing ka sem jong u ki dang ïoh thiah lyngngai.
Une u rangbah u la ïathuh ba u la lait na ki tyrsim jong ka jingïap da ka jingwan poi biang por jong ki Pulit ka Sohiong Out Post hadien ba la pyntip mar mar da ki bahaing hasem halor kane ka jingshah thombor jong u.
Haba kylli, u Bah Spenri u la ong ba um ju don dak sniew eiei ïano ïano ruh bad kata ka jingkynnoh jong ki briew pyrshah ïa u ruh ka dei ka bym don nongrim satia.
Ha kaba ïadei bad kane ka jingjia, na ka liang jong u President ka National Hynniewtrep Peoples’ Federation (NHPF) u Bah Andreas Nongkynrih u la pynrem jur ïa kane ka jingjia bad dawa ruh ïa ki bor jong ka aiñ ban pynlong ka jingtohkit kaba bniah halor kane ka jingjia bad ban kem ruh mardor ïa kiba donkti halor kane ka kam thombor ïa ka longrynieng jong u Bah Spenri.