Shillong, Nohprah, 04: Uwei u nongñiah kali bad u nongbud ki la lait thaw na ka jingmynsaw bad na ka jingjia ba sngewsih hadien ba u post eletrict ba la bam sarang na trai u la khyllem kynsan ha ka por kumba 1:00 baje mynsngi ha Club, Golflink, Shillong ha ka sngi Balang.
U nongñiah jong ka kali Pick Up Truck kaba don ïa u nombar ML10 B 6914, u bym kwah ban pynpaw kyrteng, u la ïathuh katba u dang pynieng ïa ka kali harud surok bad leit bar ha ka painkhana paidbah kaba don kane ka jaka bad ynda la wan phai sha ka kali hynrei shwa ban mih noh na kane ka jaka, u post electrict u la khyllem kynsan bad u la hap halor ka bynta ba shakhmat jong ka kali.
Kine ki arngut ki la ïathuh ba tang shu khyllem u post electrict ki la mih pynstet napoh kali tang shu ïohsngew ïa ka jingbthei jong ka bording kaba la pynher mynsiem ruh ïa ki.
Ki nongtrei jong ka Meghalaya Energy Corporation Limited (MeECL) tang shu ïoh jingtip halor kane ki la leit mar mar ban weng noh ïa u post electrict ba la khyllem ha surok khnang ban weng ïa ka jingdheng kali ha kane ka jaka.
