Jowai, Jylliew 22: Uwei u Koidi ïa uba la tip kyrteng kum u Shiningstar Pala ba la rai set phatok shi jingim, ula lait phet na District Jail Jowai mynta ka sngi 22 tarik ha ka por kumba 2.30 baje eiei jong ka nohphai sngi.
Katkum ka thymmei khubor ba la ïoh lum la ïathuh ba utei u koidi la rai set phatok ïa u na ka daw ka kam pyniap briew, bad ula lait phet ha ka por ba u dang sait ïa ka kali Ambulance shabar jong ka phatok.
Une u koidi lem bad arngut kiwei pat ki koidi kiba kyrteng u Small Phawa uba shah pynngat ha ka POCSO bad u Kwall Laloo uba ngat ha ka kam pyniap briew hi ki la lait phet na phatok ha u Jymmang 2017 hynrei la ïoh kem biang ïa une u Shiningstar da ki pulit katba ïa kitei ki arngut haduh mynta ym shym la ïoh kem shuh ïa ki.
