Shillong, Naiwieng 16: U President ka BJP Meghalaya u Bah Ernest Mawrie ha ka sngi Balang u la kob ïa u Myntri Rangbah ka jylla u Conrad K Sangma ba lada u nud ban ïakhun tang na South Tura Constituency ym ban ïakhun na ki ar tylli ki seat ban pynjlan jubor ïa ka lawei saiñ pyrthei jong u bad ong ba lada u Myntri Rangbah u nud u dei ban ïakhun beit pyrshah ïa u Vice President ka BJP Meghalaya u Bernard N Marak ha ka ilekshon MLA ban long ha u snem 2023.
Ha ka kyrwoh, u Bah Earnest u la ong ba ïa u Bernard Marak la pyllait noh na phatok ki pulit wat hapdeng ki jingpyrshang borbar ka sorkar NPP ban set phatok ïa u.
U la ong ruh ba ki jingkynnoh pyrshah ïa u Bernard kam don kano kano ka nongrim bad ka jingpynshisha bad ong ba kane ka dei tang ka buit pynhiar kput ha ki kam saiñ pyrthei.
U Bah Earnest Mawrie uba dei ruh u nongaibuit u Myntri Rangbah u la kam ba u Myntri Rangbah u da tieng thot thot namar ka jingïoh jingshaniah u Bernard na ki paidbah bad ba u Myntri Rangbah u lah ban rem kput ruh ha ka ilekshon a South Tura.
“Ki paid nongshong shnong ka Tura bad jong ka jylla hi ki la rai ban pynhiar khet da kaba kin pynrem kput ïa ka NPP ha kane ka ilekshon ba wan,” u la kam.
Shuh shuh na ka liang jong u, u phah ka kitbok eh daw sha u Bernard ba un koit un khlaiñ noh na ki jingshah leh tohmet katba u dang shah set patok ha ki pulit lada ka don kaba kum kata.
U la ong ruh ba u Bernard u dei u nongïakhun ba satar pyrshah ïa ka bamsap bad u la ai ruh ka jingkyntu kynpham ba un bteng khlem randien ban ïakhun pyrshah ïa ka jyrsieh bamsap ha ka jylla.
