Shillong, Naiwieng, 11: Saw ngut ki nongïalam jong ka Meghalaya Commercial Truck Owners and Drivers Association (MCTODA) kiba la shah kem ha ki Pulit ki la ïoh ban mih na Shillong District Jail ha ka janmiet sngi Baar hadien ba ka Kashari ka la ai jamin noh ïa ki.
Ki nongïalam ka seng kiba la shah kem hadien ka jingbat bad ther maw ïa ki trok ha ka miet 4 bad 5 tarik Naiwieng, 2025 ha surokbah ka shnong Mawryngkneng, East Khasi Hills District ki kynthup ïa u President u Bah Mosklandar Marngar, uba la shah pynngat ha kiba bun ki mukotduma ba la ujor hapoh ka MMPO Act bad ha ka Bharatiya Nyaya Sanhita (BNS).
Katba lai ngut kiwei pat ki nongïalam kiba la ïoh jamin ki long u Bah Teibor Marngar, u Bah Thrangbor Lyngdoh, bad u President jong ka MDTODA, Jaiñtia Hils Unit u Bah Heibor Pariat.
Tang shu mih na Shillong District Jail, ki saw ngut ki nongïalam ryngkat bad ki bahaiing hasem lem bad ki dkhot ka seng ki la kiew beit beit ha kali ban leit ïakynduh ïa ki paradkhot kiba dang ap ha ka shnong Mawryngkneng.
Kum ban shu pynkynmaw, Ka MCTODA ka la pynlong ïa ka jingïakhih ba khlem pud sngi naduh ka 27 tarik, Risaw, ban dawa ïa ki karkhana pynmih dewbilat ban bud ïa ka dor kit ba la pynbna da ka Sorkar kaba long T. 9 shi kilometre na ka bynta shi metric tonne.
Hadien ka jingkem ki Pulit ïa ki nongïalam jong ka MCTODA, ki nongñiah trok kim shym la randien hynrei ki la ïalum beit ha surok Mawryngkneng bad ha ki sngi kiba bud ruh ka la mih ruh ka jingpyndonkam ki Pulit ïa ka bor da kaba pynbthei ïa ki stunt grenade bad kawut lathi ïa ki nongïakhih namar ka jingbat ïa ki trok kiba kit ïa ki mar jong ki karkhana pynmih dewbilat na East Jaiñtia Hills District.
Khnang ban tem ïa ka jingïakhih jong ki nongñiah trok, u Symbud Myntri Rangbah ka Jylla uba khmih ïa ka tnat Transport ha ka sngi Saitjaiñ jong ka taiew ba ladep u la khot ïakren ïa ki dkhot ka seng ha Jowai da ka jingkyrpad ba kin pynkut noh ïa ka jingïakhih ba khlem pud sngi bad wan sha ka miej jingïakren.
Hynrei namar ka jingshah set along jong ki nongïalam, ki dkhot ka MCTODA ki la pynpaw ba kim lah satia ban shim ïa kano kano ka rai hynrei ki la pynpaw ba ïa ka rai kin shim tad haduh ba ka Sorkar kan da pyllait shwa ïa ki na along.
Ka Joint Action Committee (JAC) kaba kynthup ïa ka East Jaiñtia Hills Truck Owner & Driver Association (EJHTOTA) bad ka Jaiñtia Hills Truck Owners Association (JHTOA), ha ka Lah Sngi u Blei ki la dawa ïa u Symbud Myntri Rangbah ka jylla uba khmih ïa ka tnat Transport Bah Sniawbhalang Dhar ban khot ïakren ïa baroh ki seng trok khnang ban pynkut noh ïa ka jingïakhih jong ka MCTODA.
Ka Jaiñtia Hills Cement Manufacturing Association (JHCMA) dang shen ka la ong ba ka jingkit dewbilat bad clinker na Meghalaya ka la shah ktah naduh ka 27 tarik Risaw namar ka jingïakhih ba la pynlong da ka MCTODA.
“Kane ka jingkhanglad kaba dang ïaid shakhmat ka la pynsangeh ïa ka jingpynpoi mar bad ka la ktah jur ïa ki kam shna jingshna ha ka thaiñ baroh kawei. Baroh ki karkhana dewbilat ki la khang khyrdep mynta la bun sngi, ngi la kyntu ïa ki bor synshar ban tuklar lem khnang ban dup lah ban bteng ïa ka jingpynpoi mar bad na ka bynta ka jingshngaiñ jong ki trok kit mar bad ban ïada na ka jingshah pynthut ha ïa ka ïoh ka kot kaba ïadei bad ki kam karkhana bad ki kam pynroi,” la ong u kyrwoh ka JHCMA.
