Lait jamin kiba shah kem na ka rally kyrduh kam ka Seng FKJGP

Shillong, Naiwieng 28: Ki saw ngut ki ar tylli ki seng bhalang kata arngut ki dkhot ka Federation of Khasi Jaintia & Garo People (FKJGP) bad ar ngut jong ka Khasi Students Union (KSU) kiba la shah kem halor ka jingkulmar ha ka rally ba ka FKJGP ka pynlong na Motphran sha Madan Ïewrynghep halor ka kyrduh kam ha la jylla, ha ka janmiet ka sngi Nyngkong ki la lait mih noh na Shillong District Jail hadien ba ki la shong ha katei ka phatok la jan kot shibnai.
Ka jinglait kine ki saw ngut ki dkhot seng bhalang la sakhi ba kiwei pat para dkhot ki dap da ka jingkmen ha ka jingwan shaw bad ban pdiang burom rygkat ka jingkynhoi risa bad ka jingkdup ieid ïa u para dkhot uba la lait mih na phatok kaba ki la shah set jan shibnai ha kane ka jingpdiang burom la donlang kiba haïing hasem jong ki bad ruh u President ka KSU u Bah Lambokstarwell Marngar, u President ka FKJGP u Bah Dundee C Khongsit bad kiwei kiwei ki nongïalam kine ki arseng.
Haba kren bad ki nongthoh u Bah Lambokstarwell u la ong ba ka jingshah shah set phatok kine ki saw ngut ka long ka jingphrang ïa ki ban long kiba shynrang mynsiem ban shakri ïa ka jaidbynriew wat lada dei wat ban rung byndi.
“Kine ki saw ngut kim dei ki riew be-aiñ hynrei ki dei ki dkhot ka jaidbynriew kiba mih sha madan ban dawa ïa ka hok ïohkam ïohjam ki samla ha ka jylla,” u la ong.
U la ong ba ka jingkyrduhkam ki samla bad ka jingïohkam tang kito kiba don kiba ithuh ithaw ha ka sorkar ka dei ban kut noh syndon.
“Ngi kwah ba ka rukom thungkam kan long kaba shai bad kaba khuid kaba ki samla wad kam kin sngewhun haba ki wad kam ym ban mih ka jingduh jingkyrmen namar kim don kiba heh ba haiñ ban ïakren ba kin ïohkam,” bad bynrap “ka wad kam tang kiba ïoh pisa ban thied ïa ki post ka dei ban kut noh syndon,” u la ong.
U la ong ruh ba lada peit bunsien ka sorkar ka lapmiet bad pynlleit jingmut tang ban thwet ïa ki dkhot seng bhalang haduh ba ka klet la ka kamram ban ai jingïada ïa ki khappud haduh ban wan jia ka apot ïa ki saw ngut ki para ri na ka shnong Mukroh ban duh ei la ka jingim ha ki ktang suloi ka jaidbynriew.
“Ka sorkar ha ka jaka ba kan pyllut ka por jong ka ban ïatai ïa ki policy na bynta ka jylla hynrei ka lapmiet ban thwet bad ban kem ïa ki dkhot seng bhalang,” bad bynrap “phin peit bha ba katba ka sorkar jong ngi ka lapmiet ban kem ïa ki dkhot ki seng bhalang ka sorkar Assam ka la siat ïap ei ïa ki saw ngut ki paradoh para snam jong ngi,” u la ong.
Shuh shuh u la ong ruh ba ka jinglong jingman ka jylla mynta ka dawa ka por ba ka sorkar ka dei ban kyndit thiah noh ban sngewthuh ïa kaei kaba ka jylla ka donkam bad ban pynurlong ruh.
“Kane kawei ka khubor kaba shai nga kwah ban ai sha ka sorkar wat pynshit wat ai ding ïa ki khun samla ka jaidbynriew da ka jingthwet bad jingpharep ba laiphew jait ïoh ba ka Tlang kan kylla Lyiur hynrei leit kem mardor shuwa ïa kito ki pulit kiba la shim ïa ka jingim ki paradoh para snam jong ngi,” u la ong.