Nongpoh, Lber 21: Ki nongïalam bad ki dkhot jong ka Hynñiewtrep National Youth Front (HNYF) ba kynthup naduh ki nongïalam na Ri Bhoi, Sengkmie bad ryngkat ki bahaïing hasem ha ka janmiet Sngi Thohdieng ki la pdiang burom ïa u Bah Tarson Lymba, u dkhot ka HNYF ba la ioh jamin na ka jingset along mynta la shi snem halor ka jingshah kynnoh ba u donkti bad ka seng kieng atiar HNLC ba la kheiñ be-aiñ.
U Bah Tarson Lymba, u dei u dkhot ka HNYF ba bat ïa ka kyrdan Disciplinary Secretary ka seng kmie bad u President ka HNYF Southern Riwar Circle bad kum u dkhot ba shitrhem bad ba la rim tam ka seng HNYF.
Kum ba pynkynmaw, u Bah Tarson Lymba kum u dkhot ne nongïalam ka HNYF u la shah kem ha ki pulit ka jylla ha ka 10 tarik u Lber 2024, kaba dei halor ka jingkynnoh don kti ba ka kynhun seng HNLC bad ha ka 14 tarik u Nailar 2024 u la ioh jamin bad dei ha katei kajuh ka sngi ba ki Pulit ki la kem biang ïa u ban rah bad ban set along ha ka along kaba don ha Mawsyntai ha Ri Bhoi District.
Ki nongïalam ka HNYF bad kiba haïing hasem ki la pynpaw ïa ka jingsngewkmen ba mynta ka sngi ka 21 tarik u Lber 2025 u Bah Tarson Lymba u la ioh jamin bad u la ioh ban leit phai noh sha la ïing la sem.
U Bah Hesting Lyngdoh, President ka HNYF Northern Region ha Ri Bhoi hadien ba la pdiang burom ïa u Bah Tarson Lymba, u la ai ka jingkhublei kaba khrpang ïa ka ïingkashari kiba la ailad ban bah jamin lyngba ka jingkyrpad ban pynlait noh ïa u bad kum u nongïalam ka seng na Ri Bhoi u la pynpaw ruh ka jingsngewnguh ïa u nongïasait aiñ ka seng u la shim khia bha ïa kane ka kam ban pynlait noh ïa u dkhot ka seng na ka jingshah tehshah khum ha ki kti jong ka aiñ.
U Bah Tarson Lymba ruh haba kren ha kane ka sngi, u la ainguh aidem ïa u Blei nongbuh nongthaw uba la don ryngkat ha kitei ki jingïakynduh jingeh jong u kaba dei hadien ka jingshah set along bad ha kajuh ka por u la ong ruh ba kane ka jingshah kem jong u kam shym la pynduh mynsiem ïa u bad ka long pynban ka jingai mynsiem ba un dang lah ban trei shithrem ïa ki kam ka seng bad kumjuh ruh ban dang ai ka jingshakri ban ïada ïa la ka jong ka jaid bynriew.
