Lai tylli ki Ambulance bad ki Sound System ai ka Star Cement ïa ka Nalarympei Music Band

Khliehriat Risaw, 11: Ka Star Cement, Lumshnong lyngba ka Corporate Social Responsibilitiy (CSR) ha ka sngi Balang ka la aiti da ki kali Ambulance sha ka shnong Tongseng, Lad lumtongseng bad Sakhri kiba don ha ka Elaka Narpuh, East Jaiñtia Hills District.
Ha kane ka sngi, ka Star Cement ka la aiti ruh da ki tiar tem sha ka kynhun tem ba la tip kyrteng kum ka Nalarympei Music Band na ka shnong Umstaiñ.
U Manager jong ka CSR Star Cement Lumshnong, u Kingshok.K.Borah, u la ong ba kane ka jingnoh synñiang da ki kali Ambulance ïa ka shnong Tongseng, Lad Lumtongseng bad Sakhri kan ïarap ban ai ïa ka jingshakri ïa ki nongshong shnong haba don ka pang ka shitom.
U la ong ba kane ka jingnoh synñiang da ki kali kit nongpang ka dei kaba ka Star Cement ka ju ïarap na ka por sha ka por bad lyngba ka CSR yn sa nang ïai bteng ban ka ai jingïarap ha ki snem ki ban dang wan.
U Borah u la ïathuh ba ki jingïarap ba la ai sha ka Na la rympei Musical Band ki long ka Sound System shi song, ki PA System, Guitar bad ki Drum.
“Kane ka long kum shi bynta ban kyntiew ïa ki samla kiba don ïa ka sap ha ka put ka tem,” u la bynrap.
U Waheh Shnong jong ka shnong Tongseng u Bah Waris Suchen, uba la kren ruh na ka bynta ka shnong Tongseng, Lad Lumtongseng bad Sakhri u la pynpaw ka jingsngewnguh ïa ka Star Cemeny kaba la ai sngewbha da ki kali kit nongpang lyngba ka CSR sha ki lai tylli ki shnong ba kin dup lah ban pyndonkam ha kano lano ka por ba wan lap ka pang ka shitom.
U Waheh Shnong jong ka shnong Umstaiñ u Bah Robi Suchiang u la kyntu ïa ka Star Cement ba kan nang kiew shaphrang khnang ban dup lah ban theh jingïarap shuh shuh sha ki shnong ki thaw bad ong ruh ba ka shnong ka ïoh ïa ka roi ka par ryngkat ka jingïatreilang bad Star Cement.