Lai sngi ai por ki trai trok ïa u President ban mih shakhmat lym kumta kin jied hi noh da uwei u President

Khliehriat Kyllalyngkot 27: Ki trai trok kiba don ha ka shatri jong ka Jaiñtia Hills Drivers Association (JHDA) ki la pynpaw ïa ka jingsngew bitar namar ka jing leh don bor bad jingphet jyndat u President ka Association na ka jingïalang ba la pynlong mynta ka sngi ha Kongong, East Jaiñtia Hills District bad ki la ai por ïa u haduh lai sngi kata haduh ka 3 tarik u rymphang bad lada um mih shakhmat na ka liang ki paidbah kiba dei ki trai trok kin ïaid beit shakhmat ïa ka kam ha kaba kin sa khot hi noh ïa ka jingïalang.
Haba kren sha ki pathai khubor, uwei na ki trai trok, u bah B.Thubru u la ong ba “Mynne ka sngi la khot ïa ka jingïalang paidbah da u President ka JHDA, u bah Biang Shylla, hynrei u khlem ailad pat ïa ki paidbah ban kren ha ka jingialang hynrei u la shu kren hi tang marwei, namar na ka liang ki paidbah ruh ki don bun ki mat ba ki kwah ban kren halor ki kam kiba ïadei bad ka Association, kumta ngi ki paidbah ngi pyrshah jur ïa kane ka jingleh u President”
U bah B.Thubru, u la iathuh shuh shuh ba ïa ka jingïalang ruh khlem lah ban pyniaid beit haduh kaba kut namar ba u President u la shu phet jyndat na ka jingïalang bad ka jingphet jong u ka dei na ka daw ba ki paidbah ki dawa ba dei ban pynthmmai noh ïa ki nongkitkam jong ka Association bad hadien ba phet u President na ka liang ki paidbah kiba dang ïa don ha ka jaka ba long jingialang ki la shim ïa ka rai bad ki la rai ban ai por ïa u haduh ka 3 tarik u rymphang ba un mih shakhmat bad lada kim ioh jingpynshai eiei na u President kata haduh ka 3 tarik ki trai trok ki sa khot noh da kawei ka jingialang bad yn pynkheiñ President noh ïa u Biang Shylla, la ong ruh ba lada ym leh ha kane ka dur une u briew un bat jubor beit ïa ka bor namar u la tip ba ki paidbah kin nym ngeit shuh ïa u.
Na ka liang ki trai trok ki la kynnoh ruh ba ka rukom ai jingpynshai halor ki kaiphot treikam ba la pynshai da u President jong ki trai trok, u bah Biang Shylla ruh ka dei ka bym shai satia bad u la ong beit bad pynpaw beit ba um shah ban kren ki trai trok ha ka jingïalang.