Lai snem nga pynioh 107 klur, kiba kwah nga kloi ban ialam wad skim sha Delhi : Bah Sanbor

Shillong, Nailar 01 : U MLA ka BJP na Shillong South, Bah Sanbor Shullai ha ka sngi Palei u la ong ba ïa ka skim MLA kaba long 250 lak ha ka shisnem ki MLA kin ïoh beit wat lada ki shu thiah ha iing ruh hynrei kaba kongsan ka long kumno ban wad ïa kiwei pat ki skim kam pynroi la ka long na ka sorkar jylla ne na ka sorkar pdeng.
Haba kren bad ki lad pathai khubor hadien ka jingïalang buddien ïa ki skim kam pynroi ha ka constituency bad ki ophisar jong ki tnad bapher bapher jong ka sorkar jylla, u Bah Sanbor u la ïathuh ruh ba nalor ka 250 lak, ki MLA ki ïoh ruh sa 8 lak tyngka kiwei pat ki skim kum ka skim ïarap na bynta ki kam ïalehkai kaba long 3lak tyngka, nangta ka skim na bynta ka put ka tem kaba long 2.50 lak tyngka bad kumjuh sa 2.50 lak tyngka na bynta ban kyntiew ïa ka riti dustur ne ka kolshor.
“Kumta lada kheiñ lang baroh nalor ka 250 lak ka skim MLA, 8 lak kine kiwei ki skim, baroh ki la poi sha ka 258 lak ha ka shisnem khlem da kheiñlang ïa ka Discretionary Grant kaba ju ïoh mynta 10 lak shisnem,” u la ong. Nalorkata, u la ong ruh ba u kwah ban pynkynmaw ba ïa ka skim MLA jong u 2023-24 u la dep ban pyllait naduh u bnai Kyllalyngkot ha ka jingïalang kaba long ha Assam Club.
Haba kren halor ka DG, u Bah Sanbor ula ong ba kane kadei ka lad ai jingïarap kaba paka tam eh ha ki jingjia ba donkam kyrkieh khamtam ha ka ïap ka im bad ka pang ka shitom. “Haba ki wan sha ki MLA dei ba ki jynjar ki wan lane ba ki kynduh ha ka khim khait. Bad nga tip ruh kino kiba da ïa kynduh shisha ïa ki jingeh. Kumta, naduh kiba duk haduh kiba riewspah ka iing jongnga ka plie baroh 24 kynta.”
U Bah Sanbor ha kane ka sngi u la ong ruh ba haba u kheiñ kyllum lang ïa ki skim kam pynroi kiba u la pynïoh ha kine ki lai snem kata naduh u snem 2022, 2023 bad haduh u 2024 baroh ki la kot sha ka 107.46 klur tyngka. “Kine ki kynthup lang ïa ki skim kiba nga pynïoh kum u MLA na ka sorkar jylla bad ruh kumjuh lyngba ka sorkar pdeng.”
Shuh shuh u ong ba kum u MLA uba trei shitom ban wanrah ïa ki skim kam pynroi na bynta ki paidbah u kloi ban ïarap lang ïa kiwei ki MLA ba kin nang ban wad skim wat shaduh Delhi ruh. U la ïathuh ruh ba na ka party ki ju don ruh ki kynhun kiba ïarap ban pynshna ïa ki Detail Project Report bad kumta u kloi ban ïa kren lang bad ki ban ïarap ïa ki MLA na ka jylla lada ki kwah ban bud ïa ka nuska jong u.
U Bah Sanbor u la ong ruh ba kiba smat ban wad skim kin ïoh beit kampher lada ki don ha ka Liang Pyrshah ne Liang Synshar bad ruh lada ki don ne kim don ha ka shuki Myntri.