Lai ngut ki samla kiba shi para ar kmie ki iap ha Shen ha ka jingban ka dieng ha Hingaria

Khliehriat Iaiong 21: Kawei ka jingjia kaba la jia ha ka shnong ba khappud bad ka ri Bangladesh ha Hingaria, East Jaiñtia Hills District ha kaba lai ngut ki samla rangbah kiba dei na kajuh ka ïing shi para ar kmie ki la iap ha Shen ha ka jingshah ban ha ka dieng, kane ka la jia ha ka miet myn synia jong ka ka sngi saitjaiñ katba ki dang iohthiah lyngngai ha ka ïing trep ba ki ju sah miet ha ka bri ba ki trei ha kaba ha katei ka miet ka la don ka jingbeh lyer kaba jur bad ka jingther u slap, kumta ka dieng ka la hap ban ban ïa ki katba ki dang iohthiah.
Kitei ki lai ngut ki rangabah kiba la khlad ha ka jingshah ban ka dieng ki dei kiba la tip kyrteng kum u Asman Bareh, uba dei u khun jong i kong Ren surong bad bah Pril bareh, uwei pat u lanot u dei u bah Goldy Surong, u khun jong i kong Kesting Surong bad i bah Rit Pohshwet bad uwei pat u lanot u dei u bah Starty Surong, u khun jong i kong Bonnieta Surong.
Ki thymmei khubor ki iathuh ba kitei ki lai ngut shi para ar kmie, ki dei kiba ju trei sha bri bad ka bri kaba ki trei ka jngai bha na shnong ha kaba hap ban shong da ka lieng haduh lai kynta bad hadien kata hap iaid sa da ka kjat haduh lai kynta, kumta kitei ki samla rangbah ki ju sah miet sha bri ban pyndep ïa ki kam rep jong ki.
Ia ka met iap jong ki la lap da kiba ha ïing ha ka sngi nyngkong, ha kaba kine kiba ha iïng ruh ki dang thmu ban leit iarap kam lem ïa ki sha kata ka bri, hynrei ynda ki la poi ha kata ka jaka ki la sngew kyndit shi katdei eh namar ki la lap ba kitei lai ngut ki la iap ha ka jingshah ban ka dieng, ki la sngewthuh ba kitei ki lanot ki la khlad naduh ka miet sngi siatjaiñ ka 16 tarik namar ka jingjur ka lyer bad u slap ka la pynkhyllem ïa ki dieng ki siej.
Ia kitei ki lanot la warah sha shnong (Hingaria) ha kaba ïa ka met ba sah jong ki la pyndep bad tep don burom hynnin ka sngi.