Nongstoiñ, Jymmang, 5: Ka North Eastern Council kaba dei ka tnad treikam jong ka sorkar India, ka la bei tyngka haduh 3 klur tyngka ban pynbha ban pynbit pynbiang ïa ki katto katne tylli ki jaka pule, kiba don ha ka thaiñ Mawshynrut kiba la donkam shisha ïa ka jingïarap ha kaba ïadei bad ka jingpynbha ïa ki ïing skul.
Ïa kane la sakhi lyngba ka jingpyntrei ïa ka building jong ka Ri Lyngngam Presbyterian College kaba la ïoh ïa ka bhah haduh 1 klur tyngka, ka St. Thomas Secondary School, Nongjri kaba la ïoh 50 lak tyngka, ka St. Savio Secondary School Riangdim 50 lak ryngkat bad 10 tylli kiwei pat ki school kiba la ïoh mar 10 lak tyngka.
Ka jingïoh ïa kane ka scheme ka la pynkmen shisha ïa ki bor pynïaid skul bad College, kiba la pynpaw shisha ka jingsngewnguh ïa ka NEC, kumjuh ïa u nongmihkhmat ka thaiñ u ba la lamkhmat ban pynïoh ïa kane ka scheme, na ka bynta ban nang kyntiew bad nang saiñ dur ïa ka pule puthi ha ka dong ka thaiñ.
U Rev B.K Shangpliang, Vice Principal ka Lyngngam Presbyterian College bad Secretary ka Governing Body, ha ka jingïakren bad ki nongthoh khubor u la ong ba ka jingïoh ïa kane ka scheme na ka NEC, ka la long shisha ka jingkyrkhu ïa ka college khamtam ba kane ka college, ka dei kaba la seng bad pynïaid da ka Ri Lyngngam Presbytery bad ka long kaba eh haduh katta katta ban ïoh tei ïa la ka jong ka building jong ka College tang nalade hi.
U la ïathuh ba ka jingtei ïa kane ka building jong ka College ka la ïaid shait shait mynta bad ha kane ka building, ki don 6 tylli ki kamra class, kawei ka kamra jong u Principal, kawei ka Staff Room, kawei ka Common Room, bad shiphew tylli ki paiñkhana kynthei bad shynrang kiba la shna ha baroh arliang jong katei ka building.
U la pynpaw ba kum ka college kim lah khlem da pynpaw ka jingsngewnguh ïa u MLA ka thaiñ u Bah Gigur Myrthong, u ba la trei shitom ban pynïoh ïa kane ka scheme bad u la ai ruh ka jingkitbok kit rwiang ba un nang lah shuh shuh ban kyntiew ïa ka dong ka thaiñ ha ki liang baroh.
Katba na ka liang u Fr. Shephen Lamin, Parish Priest jong ka Nongjri Parish, Mawshynrut, u la ïathuh ba ha ka jingshisha um khmih lynti ban ïoh ïa kane ka building, namar ha kaba nyngkong u pan jingïarap tang na ka bynta ki paiñkhana bad kiwei kiwei ki jingdonkam barit. Hynrei ka long kaba donbok ba ka school ka la ïoh ïa ka jingïarap kaba haduh 50 lak tyngka na ka Scheme NEC bad ïa kane la wan ban aiti hi da u MLA bad ïa ka jingtei ïa ka building la lah ban pyndep, ha kaba mynta ki la ïoh ruh ban pyndonkam ïa ka.
U la ïathuh ba ha kane ka building ki don 6 tylli ki kamra ba kynthup naduh ka kamra class, kamra Principal, kamra nonghikai bad kumjuh ki paiñkhana na ka bynta ki khynnah skul kynthei bad shynrang bad kumjuh na ka bynta ki nonghikai.
