Lai bnai shu sngap jarjar ka MePDCL watla dawa bailutksan ki bahaïing i heprit ba duhnoh ïa ki kti

Mawkyrwat, ‘Naitung, 28: Ka long kaei kaei kaba pynduh mynsiem bad pyndom ha kawei ka liang namar wat hadien ka jingkyrpad ïa ka sorkar lyngba ka ophis jong ka MePDCL ba kan leh ei ei ne ai jingïarap na ka bynta i hep rit iba la shah bat ha ka bordor ha kine ki khyndiat bnai kiba la dep bad ba i la duh noh ïa baroh ar tylli ki kti hynrei kaba sngewsih ka long ba haduh mynta kam pat ai ki lad jingïarap.
Ha kaba ïa dei bad kane ka bynta, ka Khasi Student’s Union (KSU) jong ka South West Khasi Hills District ha ryngkat bad u bah P.S. Lyngdoh ha ka sngi balang ki la leit jngoh ïa i heprit ha ka shnong Mawkohphet, South West Khasi Hills District. Kane ka jingleit jngoh ka long kum shibynta ban buddien ïa ka jingjia ba shah bat ha ka bording kaba la jia ha kine ki bnai ba la dep ha kaba i tei ka heprit i la duh noh ïa baroh ar tylli ki kti tang namar ka jingbym buh ïa ki jingker ïa u Transformer uba don hajan jong kawei ka skul.
U bah Forwardman Nongrem, President ka KSU, South West Khasi Hills District ha ryngkat u bah P.S. Lyngdoh ha ka jingkren jong ki ki la ïathuh ba ha kane ka jingleit jngoh ki la lap ba na ka liang jong ka sorkar haduh mynta kim pat shem la leh eiei ne phai khmat lyngba kano kano ka jingïarap na ka sorkar lyngba ka tnad ba dei peit ïa ka bording ha kaba watla na ka liang jong ka seng naduh ba la jingjia kane ka jingjia ba sngewsih ïa i heprit ruh ki la dep ban buh ka jingkyrpad bad jingdawa ba dei ban siew ïa ka bai lut ksan ne jingsiew bai bam shi jingim (life compensation) ïa i.
Namarkata, kum ka seng ha ryngkat da ka jingïatrei lang bad kiba ha ïing ha sem jong kane i heprit kim lah ban shu sngap mynthi halor kane ka bynta bad ka KSU ruh kan ïai dawa ïa ka hok jong ine i heprit lyngba da ka jingïakyrshan lang bad kiwei pat ki sengbhalang bad ki paidbah jong ka jaidbynriew. Ha kajuh ka por ki la pynpaw ruh ba ki don ka hok ban ai ka jingïarap ïa ine i heprit la ha kino kino ki bynta ha ryngkat da ka jingïasngewthuh jingmut bad ka ïing ka sem bad “lada ka sorkar kam leh ei ei ym banse ngin hap ban ïaid ban shim da kiwei pat ki lad ki lynti wat haduh ban da poi u pud ban ïaid katkum ki kyndon aiñ ruh kan ialeh ban pynïoh ïa ka hok ba i heprit i dei ban ïoh”, ong ka kyrwoh na ka seng KSU.
Kumta, ka KSU lyngba da ka jingïamynjur lang bad kiba ha ïing ha sem jong i tei i heprit ki la buh ki kyntien ba lada ka sorkar ka dang leh mynthi bad kam leh ei ei ïa ine i hep rit katkum ba ka dei ban ïoh ïa ka jingsiew kaba shyrta jingim jong i (Life Compensation) ym banse ka hap ïaid noh da kawei pat ka lynti wat haduh ban da poi u pud ban hap ïaid da ki bor jong ka aiñ, pynkut u bah Forwardman Nongrem.
Ha kane ka sngi, na ka liang ka ïing ka sem jong i heprit ki la pynpaw ka jingsngew nguh ïa ki paidbah jong ka Bri u Hynñiewtrip naduh ki sengbhalang bapher bapher, ki ‘riew shimet, ki Balang bad kum kiba ha ïing ha sem kim lah shuh ban siew kylliang ïa ki jingai jingïarap na ka bynta ka khun jong ki ha ka por ba ka dang don ha ki jaka ai jingsumar ha Shillong la ka long ki jingïarap da ki pisa bad kiwei de ki jingïarap bad ka jingaimynsiem.
“Shim ïa kane kum ka jingaikhublei ïa baroh lang kiba la ïa don bynta, hynrei ha kaba phai pat ha ka na ka liang ka tnad ba dei peit ïa ka bording bad kumjuh ruh na ka sorkar jylla haduh mynta kam shem la don kano kano ka dak ne ka jingpynsngew ban ai kano kano ka jingïarap watla na ka liang jong ki ki dep ban leit ïa kynduh ïa bah Prestone Tyngsong bad ïa u bah Renikton Lyngdoh Tongkar uba dei u MLA jong ka Mawkyrwat”, pynpaw kiba ha ïing.
Ha kane ka sngi la ïa dong ryngkat lang naduh ki nongkitkam jong ka KSU South West Khasi Hills District bad ka KSU Mawkyrwat Circle, u bah P.S. Lyngdoh kiba la ïa synran lang ha kane ka sngi bad kiba ha ïing ha sem jong i heprit.