Shillong, Jylliew 21: U Wankyrmen L Mawphlang bad ka Filinza Hansepi ki la jop ha ka jingïakop mareh jong ki shynrang bad kynthei jong ka 6th Shillong 10K Run 2025, kaba la pynlong da ka Meghalaya State Olympic Association [MSOA].
ïa kane ka jingïakop mareh kaba man la u snem la pynlong ha ka step sngi Saitjaiñ (21 tarik Jylliew, 2025), ka sngi kaba jan ïa ka 23 tarik Jylliew, kaba la ju rakhe kum ka International Olympic Day, ban rakhe ïa ka jingseng ïa ka International Olympic Committee ha u snem 1894. Ki jingïakop mareh kiba 10 kilo mitar la ju pynlong ha kylleng ka pyrthei bad kumjuh ruh ha nongbah Shillong, ha kaba da ki spah ngut ki nongmareh kiba la kham rangbah, ki la ïashim bynta man la u snem watla ka lynti ka long kaba jngai hynrei kaba sngewtynnat.
Nadien u Wankyrmen la wan bud da u Rangki Jonathan Pathaw bad u Rishanmehi Ryngkhlem kiba la wan ha ka kyrdan ba ar bad balai ha ka jingïakop mareh jong ki shynrang (Open men’s race).
Ha ka liang jong ki kynthei (Open Women’s), ka Filinza ka la khur ïa ka kyrdan ba nyngkong, katba ka Angelista Syiemlieh ka la wan ba-ar bad ka Inocensia Tympuin ha ka kyrdan ba lai.
Ha ka jingmareh jong ki shynrang ba 50 snem shaneng (50-plus men’s veteran), u Arvind Basaiawmoit u la wan kyrdan ba nyngkong da kaba tam ha khmat u bah Lawrence Pariong bad u Dr Mario Danny Hek kiba bud nadien. Ki lai ngut kiba wan hakhmat eh ha ka liang jong ki kynthei ba la rangbah ki long ka Mena Mary Wahlang, ka Julina Wanniang bad ka Smarless Marwein ha ka kyrdan ba nyngkong, ba ar bad ba lai.
I Mei-ieid Kmoin Wahlang, iba dei i nongmareh ba ki paidbah ki sngewtynnad bad iba long ka jingai mynsiem ïa baroh, i khlem shym la ïashim bynta mynta u snem. Hynrei ha ka jaka kata, kane ka nongmareh kaba la 70 snem shaneng, ka la shah kyrpad da ka MSOA ban kaweh ïa ka lama shuwa ban sdang ka jingmareh kum ka Kongsan bad ban aiti ïa ki khusnam ha ka jingïalang pynkut. Ha kane ka jingïalang i Mei-ieid Kmoin i la ai ruh ïa ka jingkren ai mynsiem ha kaba sdang ïa ka jingïamareh ha kaba ka la ai khublei ïa ki nongpynïaid bad ai mynsiem ïa ki nongmareh ba kin don ka jingthmu ban wanrah burom ïa ka jylla bad ïa ka ri.
Kiwei pat ki riew pawkhmat kiba la donlang ha katei ka step ki kynthup ïa u Assistant Director jong ka tnad Sports and Youth Affairs, Bah Paia B War Nongbri, u General Secretary jong ka MSOA u Bah Finely L Pariat bad kiwei de ki dkhot jong ka MSOA.
Ka lynti mareh ka la sdang na Polo Ground parking lot shuwa ban leit mareh sha 4th Furlong, BK Bajoria School, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Ward’s Lake, Chief Minister’s residence, Polo Bazar shuwa ban pynkut ha Polo Ground.
La sam khusnam pisa sha ki lai ngut kiba la wan hakhmat na kawei pa kawei ka kyrdan, ha kaba ki lahduh kin ïoh T.5,000, kiba wan ba ar T.3,000 bad kiba wan ha ka kyrdan kaba lai T.2,000.
