Lahduh u Swonding bad ka Juliana ha ka kyrdan mareh jong kiba 50 snem

Mawkyrwat, Nailar 14: U bah Swonding Mawlong bad ka kong Juliana Wanniang ki la long ki ar ngut kiba la rah ïa ka nam jop ha ka kyrdan ba nyngkong jong ki nongwan ïashimbynta ha ka marathon ba la tip kum ka Independent Day Run 2025 ba la pynlong ha Mandan Nongumsur, Nonghyllam, South West Khasi Hills District.
Lah ban kdew ba ïa kane ka Independent Day Run jong mynta u snem 2025 la pynlong da ka ophis jong u District Sports Officer (DSO), South West Khasi Hills District ryngkat ka District Administration lem bad ka ophis jong u Sub Divisional Officer, Ranikor Civil Sub Division lyngba ka District Sports Promotion Society (DSPS) ha kaba baroh ki nongwan ïashimbynta ki don haduh 260 ngut.
Ha kane ka jingmareh marathon ki nongïashimbynta ki kynthup naduh ki samla khynnah bad ki rangbah, ki longkmie ha kaba ka jingmareh ka long kumba 10 kilometres ei ei bad kiba kynthup ruh naduh kiba 14 snem shapoh, ki samla shynrang bad kynthei bad kiba dei ha ka kyrdan ba 50 snem shajrong jong ki kynthei bad shynrang.
Ki nongjop ha kane ka jingïakop ki long; ha ka kyrdan ba 14 snem shapoh ki long u Jimwelson Ramsiej, u Steffanson Sohphoh bad u Gyril T. Sangma kiba dei jong ki shynrang katba jong ki kynthei pat ki long ka Merryfulnes Ramsiej, ka Rikynti Kharjahrin bad ka Radika B. Sangma. Nangta ha ka kyrdan ba 50 snem shaneng ki long u bah Swondin Mawlong, u bah Wanlar Thongni bad u bah Victor Iawsai jong ki shynrang bad jong ki kynthei pat ki long ka kong Juliania Wanniang bad ka kong Kmoin Wahlang.
Ki nongjop ha ka open category pat ki long u Maikhelsing Ramsiej, u Johnstar Sohphoh, u Hasabenson Marweiñ bad kynthup de ïa ki 7 ngut kiwei pat. Ki nongjop jong ki kynthei pat ki long ka Daplin Wahlang, ka Bandasharai Marweiñ, ka Banpynshai Syiemlieh bad kynthup ïa ki 7 ngut kiwei pat.
Ha kane ka Independent Day Run 2025 la sakhi lang naduh u bah L.T, Tariang, Additional Deputy Commissioner, In-charge SDO jong ka Ranikor Civil Sub Division, South West Khasi Hills District, u bah D. Syngkon, District Sports Officer, South West Khasi Hills District, u bah S. Marweiñ, MCS, Block Development Officer, ka Ranikor C&RD Block, u bah Pius Marweiñ, MLA/MDC ka Ranikor Constituency lem bad kiwei kiwei de ki ophisar.