SHILLONG, Nailar 04: U Kresstarjune Pathaw bad ka Balasiewdor Pathaw ki la jop ha ka jingïakop mareh Open Category (18 snem-35 snem shajrong) na ka liang ki shynrang bad kynthei ha ka Shillong Run 10K 2025, kaba la pynlong da ka Agency for Sustainable Development Initiatives, K.J.P. Synod Sepngi.
Kane ka jingïakop mareh la ju pynlong man u snem bad mynta ka kynti la pynlong ha ka 02 tarik Nailar, 2025 jong ka sngi Saitjaiñ ha kaba baroh ki nongïashim bynta ki don kumba 600 ngut, napdeng kitei 51 ngut ki dei kiba don jingduna ha ki dkhot met.
ïa kane ka Shillong Run la thup ha ki lai tylli ki bynta, ka 10km Run, PWD 5k Run (kaba la buh khnang na ka bynta kiba don jingduna ha ki dkhot met) bad ka 5k Run ryngkat ki kyrdan bapher bapher ba la phiah katkum ka rta jong ki nongmareh.
U Kresstarjune u la pyndep ïa ka jingmareh da kaba shimpor 32 minit bad 13 sekon bad nadien jong u la wanbud u Akash Patel (00:32:47) ha ka jingïapher kaba tang 34 sekon ban ïoh ïa ka kyrdan ba ar, nangta ïa ka kyrdan ba lai la khur da u Rangki Jonathan Pathaw (00:33:24).
Ha ka Open women’s category, ka Balasiewdor Pathaw (00:41:46) ka la khur ïa ka jingjop, bad nadien jong ka la wanbud ka Marqueenless Ramsiej (00:42:19) bad ka Sabina Rai (00:44:11) ha ka kyrdan ba ar bad balai.
Ha ka PWD (Persons with Disabilities) Under 15 (Junior) jong ki shynrang la jop da u Banteilang Kharmuti, bud sa u Edie Satnga nangta u Manbhalang Nongsiej ha ka kyrdan ba ar bad balai. Ka Dateihun Lawai ka la jop ha ka liang jong ki kynthei.
Ha ka PWD Above 15 (Senior Men) u Betarius Suchiang u la jop kyrdan ba nyngkong, katba u Banlamjingshai Syiem bad u Pynshaitbor Suchiang ki la bud nadien ha ka kyrdan ba ar bad balai.
Katba na ka liang jong ki kynthei la jop da ka Lucyna Taro, bud sa ka Ribanlin Lyngdoh bad ka Junemary Mukhim kiba wan ba ar bad balai.
U Knerlang Phawa u la wan ba nyngkong ha ka jingïakop mareh 5km [15 snem – 18 snem shajrong] jong ki shynrang, katba u Rishanmehi Ryngkhlem u la wan ba ar bud sa u Nangjop Marwein ha ka kyrdan balai.
Na ka liang ki kynthei kiba la wan shakhmat ki long ka Lyntijingkyrmen K Jahrin, bud sa ka Dapjingkmen Lyngkhei bad ka Ibashongkun Kurbah.
Ha ka 5km jong ki Under 15 (Boys) kiba la wan kyrdan ba shakhmat ki long u Syiem Kyndait, nangta u Lambormi Phawa bad u Bankitbok Ramsiej. Katba ka Larijanai Wartde, ka Phibaniaineh Lyngkhei bad ka Iawanlang Mawlong kidei kiba la wan hakhmat ha ka liang ki kynthei.
Ha kane ka Shillong Run 10k 2025 la sakhi ruh ïa ka jingïashim bynta jong kawei na ki nongmareh ba pawnam ka Jylla Meghalaya, kata i Mei-ieid Kmoiñ Wahlang, ha kaba wat ha ka rta ba la tymmen i dang lah ban pyndep pura ban mareh ïa ka 10 kilomitar ban khur ïa ka kyrdan ba nyngkong napdeng ki kynthei kiba la 65 snem shajrong. I Mei-ieid Kmoiñ Wahlang i la pyndep ïa ka jingmareh da kaba shimpor 1 kynta bad 35 sekon.
Ka Agency for Sustainable Development Initiatives (KJP Synod Sepngi) ka la pynlong ïa ka Shillong Run 10k man la u snem ryngkat ka phang kaba ong “Run with different abilities”.
Ka jingthmu jong kane ka jingïakop mareh ka long ban pynsngewthuh ïa ki jingeh bad ïa ka jinglong ryngkat dor ki briew ba don jingduna haki dkhot met kumjuh ruh ban pynmih pisa ïa ki projek kiba ka Synod ka la seng na ka bynta ki khynnah kiba don jingduna ha ki dkhot met, kata na ka bynta ka Mairang Vidyajyoti Inclusive Secondary School, Mairang, Community Based Rehabilitation Centre, Mairang bad ka Rev. Amirkha School for Disabled, kaba ha Mawlai.
