Shillong, Ïaïong 28: Ka lympung ïamreh thong kaba la tip ba 10 km Run kaba dei shi bynta ka jingrakhe ïa ka North East Festival, 2022 and Azadi Ka Amrit Mahotsav ka la long ha ka 28 tarik Ïaïong bad bala pynïaid da ka ophis jong Deputy Commissioner, East Khasi Hills District ha ryngkat ka jingïatreilang bad ka District Sports Officer, East Khasi Hills District.
Ïa ka jingpynmareh thong la sdang na Home Guard & Civil Defence Mawdiangdiang ter ter ha Tynring bad pynkut pat ha kajuh ka jaka ha kaba la wan ban ïashim bynta shitrhem naduh kiba la rangbah, ki samla kynthei bad shynrang haduh ki hep kiba rit.
Ha kane ka jingïamreh thong ïa ka nam lahduh ha ka liang ki shynrang la jop da u Hepstarly Lyngkhoi uba la lah ban pyndep ïa ka jingmareh ha ka por 33:03.52 min katba ha ka liang ki kynthei la jop da ka Lyntijingkyrmen K.Jahrin kaba la pyndep ha ka por 43:32.04 min.
U Emphuis Nongrum u wan ha ka kyrdran ba ar da kaba pyndep ha ka por 33:11.59 min bad u Wolbetstar Ramsiej ha ka kyrdan ba lai da kaba pyndep ha ka por 34:18.15 min. U Saiñkupar Jyrwa u ïoh ïa ka nam nongïamareh ba khynnah tam da kaba pyndep ha ka por 37:24.34 min bad u Bah Ksanbor Kharmawphlang u ïoh ïa ka nam nongïamareh ba la rangbah tam bad pyndep ha ka por 54:36.40 min. Baroh kine kidei ha ka liang ki shynrang.
Katba ha ka liang ki kynthei ïa ka nam ba ar la jop da ka Marqueenless Ramsiej kaba la pyndep ha ka por 45:24.02 min, ka Claire Jone Jala Kharbhih ïa ka nam ba lai bad pyndep ha ka por 46:01.01 min, ka Charleen Wahlang ka ïoh ïa ka nam nongïalehkai ba khynnah tam kaba la pyndep ruh ha ka por 1:13 min bad ka Medari Tham ka ïoh ïa ka nam kum ka nongïalehkai ba rangbah tam bad ka pyndep ïa ka por mareh thong da 1:36 min.
