Lahduh u Elestarson bad ka Balaaibiang ha ka jingïakop pyn-i-sap ha skul Maharam

Mawkyrwat, ‘Nailar, 20 : Ka Maharam Government Higher Secondary School, Mawkyrwat ha ka 17 bad 18 tarik u ‘Nailar, 2022 ka la pynlong ïa ka Talent Fest’, 2022 ban pynshlur ïa ki khynnah skul katei ka shlem ai jinghikai ba kin pyni ïa la ki sap kyrpang ba ki don ha kaba u samla Elestarson Marweiñ u la jop kum u Most Talented Boy bad ka samla Balaaibiang Wanniang kum ka Most Talented Girl napdeng ki nongïashim bynta baroh.
Ha katei ka tamasa pyni sap ki khynnah skul ki la ïashimbynta da ka jingshitrhem ha baroh ki jingïakob bapher bapher khamtam haba ki la ïoh biang ïa katei ka lad kaba ki la duh ha ki ar tylli ki snem kiba la leit noh namar ka khlam Corona Virus.
U babu Wando Nongbet, I/c Principal ka skul haba kren ha katei ka tamasa pyn-i-sap ki khynnah skul u la ong ba ka jingpynlong jong ka skul ïa katei ka ‘Talent Fest’ man la u snem ka long ban pynshlur ïa ki samla pule ba kin mih shakhmat ban pyni ïa ka sap ka phong kaba ki don khnang ba kan ïarap ïa ki ban pynpaw pyrthei ïa la ka sap ba kin lah ban pynjanai ha ki sngi ki por ban wan na bynta ka lawei ba phyrnai jong ki.
U bah Staising Kharbteng, Sub-Inspector of Schools ka tnat pule puthi, South West Khasi Hills District, Mawkyrwat uba long ruh u nonghikai ba rim katei ka shlem ai jinghikai u la don ryngkat ha katei ka tamasa.