Shillong, Nailar 29 : U Daniel L. Wahlang bad ka Marqueenless Ramsiej ki la long ki lahduh ha ka jingïakop mareh Nartional Sports Day 5K Run ba la pynlong da ka ophis u District Sports Officer ka East Khasi Hills District, Shillong ha ryngkat ka jingïatreilang bad ka ophis ka Deputy Commissioner, East Khasi Hills District ha ka sngi Nyngkong kum shi bynta ka jingrakhe ïa ka National Sports Day.
Ïa katei ka jingïakop mareh 5K Run la kaweh ïa ka lama ka jingsdang da u Shivansh Awasthi, IAS, uba dei u Under Secretary Sports & Youth Affairs, jong ka sorkar jylla ha ka jingdonlang u Bah P.B War Nongbri Assistant Director Sports & Youth Affairs nalor kiwei kiwei ki ophisar jong ka tnat ïalehkai.
Ha katei ka jingïakop mareh la wan ban ïashim bynta haduh 650 ngut ha kaba 150 ngut kidei ki kynthei. Ha kane ka sngi rakhe ïa ka National Sports Day la pynlong ruh ha ka sien kaba nyngkong eh ïa ka jingïalehkai Mawpoiñ bad ka Tug of War Invitation Inter School Competition ha kaba ki don phra tylli ki skul kiba la wan ban ïashim bynta.
U Bah Tosanbha Marweiñ, MCS, EAC East Khasi Hills District u la long kum u kongsan ha kitei ki prokram nalor kiwei kiwei pat kiba ju sngewtynnad bad pynleit jingmut ha kitei ki jait jingïalehkai kiba la sam ruh ïa ki trophy, ki medal bad ki syrnot sha baroh kiba la jop.
Haba phai sha ka jingïakop mareh, u Daniel L. Wahlang bad ka Marqueenless Ramsiej ki la khur ïa ka song pisa ba mar 5,000 tyngka, u Wolbetstar Ramsiej bad ka Lynti Jingkyrmen K.Jahrin kiba wan ha ka kyrdan ba ar ki ïoh 3,000 bad kiba wan ha ka kyrdan ba lai ki long u Kresstarjune Pathaw bad ka Claire Jones Jala kiba ïoh ïa ka song pisa ba mar 2,000 tyngka.
La sam ruh ki khunsnam consolation ha ka liang ki shynrang, u Raplang Lyngdoh, Pratap Thapa, Bhabok Nongspung, Isswon Nepali bad Iwelljohn Ramsiej kiba ïoh mar 1,000 tyngka. Ha ka liang ki kynthei, ka Balasiewdor Pathaw, Darishisha Iangjuh, Tei Lyntishisha K.Jahrin, Ibadarisha Kharwanniang bad kaLaenbok Ramsiej.
Ha ka jingïalehkai Mawpoiñ ka Seven Set Annexe Hr. S.School Malki, ka la long ka nongjop ha ka liang ki shynrang katba ka Seng Khasi Hr. S. School. ha ka liang ki kynthei. Ha ka Tug of War, ka Seven Set Annexe Hr. S.School ka la long ka nongjop ha ka liang ki shynrang bad ka K.C. Secondary School, Fire Brigade ha ka liang ki kynthei.
