Shillong, Nohprah 07 : Ka Young SC Mairang ka la ïoh rah ïa ka nam lahduh ha ka lympung ïalehkai phutbol ba la pynlong da ka Hynñiewtrep Achik National Movement Eastern West Khasi Hills District kaba la tip kum ka 1st Phan Nonglait Women’s Football Tournament 2022.
Ka Young SC Mairang ka la khur nam lahduh da kaba pynliem da 2-1 kol ïa ka kynhun jong ka Wahliewlong SC ha ka jingïakhun phainal ha ka sngi ba ar ha madan phutbol jong ka Shnong Mairang Mission. Da katei ka nam lahduh ka Young SC Mairang ka la ïoh khur ïa ka song pisa ba 15 hajar tyngka ryngkat ka trophy bad ki takma katba ka Wahliewlong SC kaba wan ba ar ka ïoh 10 hajar tyngka.
La sam ruh ïa ki khusnam shimet ba kynthup ïa ka nam best player ba la ïoh rah da ka samla Maria Thabah, best goalkeeper la ïoh da ka samla Ibadaphun Nongsiej bad ïa ka top scorer la ïohrah da ka samla Bankyntiew Ryntathiang.
Ïa katei ka lympung ïalehkai phutbol ba la sdang ha ka 1 tarik Risaw la ïoh ban pynhap pyrda noh ha kane ka sngi da u Bah F. Nongrang kum u Kongsan ha ka jingïadonlang kiba haïing hasem jong ka Phan Nonglait, u President ka HANM sengkmie Bah Lamphrang Kharbani, ki nongïalam ka HANM Eastern West Khasi Hills District, ki longkmie longkpa, ki samla bad ki hep kiba rit.
Haba phai sha ka jingïalehkai phainal, baroh arliang ki kynhun ki la sei la ki buit ki sap bad ïakhun tyngeh ban ïoh rah ïa ka nam jop. Ka jingïalehkai kam da pher shuh haba ïanujor bad ka jingïalehkai ki shynrang, ha kaba kine ki ar liang ki la pyni ruh ki sap ïalehkai da kaba pynshat bad pyllait bol ha ka rukom kaba itynnad bad pynïap biej ïa ki paidbah ba wan peitkai.
Shwa ban kut ka kylla step, ka Young SC ka la ïoh ban plie pyrda nyngkong lyngba ka samla Bankyntiew Ryntathiang. Haba wanphai sha ka kylla miet, ka jingïalehkai ka la nang shongshit bad itynnad bha hadien ba ka Wahliewlong ka la ñion naphang sha ka kut jong ka Young SC hynrei sniewbok ki khlem lah ban pyndep ha ka liang ka thep kol.
Kumta kane ka la nang ai mynsiem shuh shuh ïa ka kynhun jong ka Young SC bad sa shisien ka Bankyntiew Ryntathiang ka la ïoh ban thep sa ïa ka kol kaba ar ha kaba ka kynhun ka la lah ban kyrda na ka jingshah thep kol haduh kaba kut bad khur syndon ïa ka nam jop jong katei ka lympung kaba nynkgong tam ba la pynlong da ka HANM Eastern West Khasi Hills District ban ai nam ïa ka Phan Nonglait ka Riew Shlur jong ka Jaidbynriew.
Shwa ka jingïalehkai phainal la ïoh ki jingkren ba kynthup naduh u Kongsan Bah F. Nongrang, Bah W. Syiemlieh, na kiba haïing hasem, President ka HANM Seng Kmie Bah Lamphrang Kharbani, President EWKHD Bah Artist Ryntathiang nalor kiwei kiwei.
U Bah Nongrang haba ai jingkren u la ai khublei ïa ka HANM kaba la pynlong ïa kaba kum kane ka jingïalehkai da kaba ai nam ha ka Phan Nonglait bad u kyrmen skhem ba lyngba kane ka lympung kin mih shibun ki riew shlur jong ka ri bad ka jaitbynriew.
Na ka liang kiba haïing hasem ki la ai khublei kyrpang ïa ka HANM kaba la lah ban pynlong ïa kane ka jingïalehkai hapdeng ki kynthei da kaba kynmaw burom ïa ka Phan Nonglait bad kyrmen skhem ruh ba ka seng kan dang ïai pynlong ïa kaba kum kane ka jingïalehkai ha ki snem kiban dang wan.
La pynshongshit ïa kane ka jingïalehkai phainal da ki jingrwai bad jingshad na ki samla bad heprit jong ka dong ka thaiñ. Ka HANM ka la pynkut da ka phainal ha kane ka sngi ka 6 tarik Nohprah kaba dei ruh ka sngi shuti jong ka Eastern West Khasi Hills District shi bynta ban kynmaw burom ïa ka Phan Nonglait kaba dei ka Riew Shlur kaba la ïakhun pyrshah ïa ki dohlieh ha ki spah snem ba la leit noh.
