Jowai, Risaw 14: Ka Wahiajer Narpuh SSC kala ïohrah ïa ka nam lahduh haka lympung ïalehkai phutbol jong ka kyrdan First Division League 2025 bala pynïaid daka East Jaiñtia Hills District Football Association (EJHDFA).
Kane ka burom ka la wan hadien ba ka la jop ïa ka jingïakhun phainal kaba la long hynne ka sngi Ba-ar, 14 tarik u Risaw, ha madan Artificial Diengshynrum, Khliehriat, da kaba pynliem noh ïa ka Byndihati CSC.
Haba bishar ïa kane ka jingïakhun, baroh arliang ka Byndihati bad ka Wahiajer Narpuh, ki la pyrshang katba lah ban khanglad kawei ïa kawei pat, hynrei ka jingïakhun haduh kaba kut jong ka por ka la ïakhaid, da mar shikol (1-1).
Hadien ba ym shym la don ba lah ban pynïakhlad ïa ka jingïakhaid jong kine ki arliang mamla, na ka liang jong ki bor pynïaid kila pynïakhun noh da ka jingïashut Tie Breaker ban rai ïa ka kynhun ka ban rah ïa ka nam lahduh.
Dei ha ka jingïashut Tie Breaker ba ka kynhun ïalehkai jong ka Wahiajer Narpuh SSC kala lah ban pynthikna ïa ka nam lahduh, ha kaba ka la lah ban jop da 7-6 ïaka Byndihati CSC.
La sam ïa ki khusnam sha ki nongjop jong kane ka lympung haka jingwan sakhi lang jong ki riewieit phutbol jong ka tnaiñ East Jaiñtia Hills District.
