Shillong, Jymmang 28 : Ka Umphyrnai SC ka la ïoh rah ïa ka nam lahduh jong ka lympung ïalehkai phutbol Under-10 Football League 2023 ba pynïaid da ka Shillong Sports Association (SSA). Ka Umphyrnai SC ka la ïoh rah ïa kane ka nam lahduh hadien ba ka la lah ban pynliem noh ïa ka Sohryngkham SC da 4-1 kol ha ka jingïakhun phainal kaba la long ha ka sngi Saitjaiñ ha madan Lawmali.
Haba phai sha ka jingïalehkai phainal hapdeng kitei ki ar tylli ki team, ka la long kaba itynnad bad shongshit bha da ka jingwan sakhi ruh ki nongkyrshan jong baroh ar tylli ki team.
Ka jingïalehkai ha kaba sdang ka long kaba mar ïa bam, bad dei ka Umphyrnai SC kaba la ïoh ban lamkhmat nyngkong lyngba ka shi kol ba la thep da u heprit Bankyrshanbor Kharkongor ha ka jingïalehkai ba dang ïaid 8 minit.
Hynrei tang hadien shi minit, ka Sohryngkam SC ka la ïoh ban pynphai kylla lyngba u Namebantei Kharbuli kata ha ka minit ba 9 jong ka jingïalehkai. Lyngba katei ka jingïathep ba mar shi kol, ka jingïakhun ka la nang itynnad bad shongshit bha.
Ka Umphyrnai SC ka la ñion sha ka kut jong ka Sohryngkham bad khlem da pynslem u Bankyrshanbor Kharkongor u la thep biang ïa ka kol kaba ar na ka bynta ka kynhun kaba la ïoh ban lamkhmat da 2-1 ha ka minit ba 11.
Lyngba kitei ki ar kol ka la nang ai mynsiem shuh shuh ïa ka kynhun, kaba la nang trei shitom, ha kaba u Wanmebantei Kharkongor ha ka minit ba 21 u la thep ïa ka kol kaba lai bad u Dibormy Kharkongor u la thep ïa ka kol kaba saw na ka bynta ka kynhun ha ka minit ïalehkai ba 23.
Ha ka jingïalehkai jong ka kylla miet, watla baroh arliang ki la ïakhn tyngeh, hynrei kim lah ban ïathep kol. Ka Sohryngkham ka la ïakhun tyngeh ban pynphai kylla pynban ka khlem ïoh lad shuh na ka jingskhem ki rangïalehkai jong ka Umphyrnai kiba la ïakhun tyngeh beit triang ban ym ailad shah thep kol ha kaba ka la pynliem da 4-1 kol bad rah syndon ïa ka nam lahduh.
