Lahduh ka Umkseh SC ïa ka 1st Division, Kyrphei SC ïa ka 2nd Div bad Thaiñthynroh SC ïa ka 3rd Div

Shillong, Nailur 25 : Ka Umkseh SC ka la ïoh rah nam lahduh jong ka lympung ïalehkai 1st Division jong ka Tyrsad Area Sports Association (TASA) hadien ba ka la pynliem ïa ka Mawponghong SC da ka jingïashut tie-breaker ha ka jingïakhun final kaba la long ha ka sngi Saitjaiñ jong ka taïew ba lah dep ha madan phutbol jong ka shnong Tyrsad. Ka Kyrphei SC ka la ïoh rah nam lahduh jong ka 2nd Division katba ka Thaiñthynroh SC ïa ka 3rd Division.
Haba phai sha ka jingïakhun phainal jong ka 1st Divisioin hapdeng kitei ki ar tylli ki team ban knieh nam lahduh, ka jingïalehkai ka long kaba mar ïabiang bor. Ki rangïalehkai jong ki ar tylli ki team ki la ïalehkai bha khamtam ruh na ka jngwan ai mynsiem jong ki paidbah kiba la kynhoi risa ïa la ki jong ki kynhun.
Ha ka jingïalehkai dei ka Mawponghong SC kaba la plie pyrda nyngkong ha ka minit ïalehkai ba dang ïaid 8 minit lyngba u Lastborn Marweiñ kaba la pynkhynñiuh ïa ka madan da ka jingshad kmen ki nongkyrshan. Ka Mawponghong SC ka la ïakhun tyngeh biang bad ñion shakhmat ban thep kol hynrei ki rangïalehkai ka Umkseh SC ruh ki khlem duh mynsiem bad pynpaw bor kylla.
Bad da katei ka rukom ïalehkai ha ka minit ba 20 jong ka jingïalehkai jlang u Rangdajied Rynjah u la thep ïa ka kol pynïakhaid. Lyngba ka jingïathep ba mar shi kol, ka jingïalehkai ka la nang shongshit bad ïathnem bha ha baroh arliang, hynrei haduh kaba kut jong ka kylla step baroh ar ki kynhun ki la leit phai sha la ki jaka khreh da kaba ïathep mar shi kol.
Hadien ka jingshong jahthait ba katto katne minit, ka jingïalehkai ka la sdang biang ha ka kylla miet bad bad baroh arliang ki la nang ïakhun tyngeh ban thep pyntam kol, hynrei baroh arliang ki la pynsepei ïa ki kabu thep kol haduh kaba kut jong ka jingïalehkai.
Ïa ka jingïalehkai la ailad biang sa da ka extra time bad ha baroh ki minit kitei ki ar kynhun ki khlem lah ban ïathep kol. Kumta ban rai ïa ka nam jop, na ka liang ki nongpynïaid ki la rah noh syndon sha ka jingïashut tie-breaker ha kaba ka Umkseh SC ka la ïoh rah ïa ka nam lahduh.
Haba phai sha ka jingïakhun final jong ka 2nd Division, ka Kyrphei SC ka la ïoh rah nam lahduh da kaba pynliem noh ïa ka Rangshangkham SC katba ha ka 3rd Division ka Thaiñthynroh SC ka la pynliem ïa ka Madan Mawser SC.
Ha katei ka sngi jingïakhun final la wan ban sakhi lang ruh u Bah Lamphrang Blah MDC uba la long kum u kongsan ha ka jingdonlang u Bah Wellbirth Rani, Bah Kenedy Khyriem, ki Rangbah Shnong jong ka dong ka thaiñ Tyrsad bad kiwei kiwei kiba la shah khot sngewbha.