Jowai, Risaw 26: Ka ophis treikam u District Sports Officer (DSO) jong ka West Jaiñtia Hills District, Jowai ha ka sngi Saitjaiñ, 25 tarik u Risaw 2025, kala pynhap pyrda noh ïaka lympung ïalehkai “Inter School Basketball Tournament 2025” bala pynlong ha Kiang Nangbah Stadium Dongmihsngi, Jowai.
Ha kane ka sngi pynkut la wan ban ïadonlang naduh u Bah Lamphrang Pohktai uba dei u Divisional Soil & Water Conservation Officer, WJHD, u DSO Bah K. Passah, Bah Latu Nartiang, Branch Manager Meghalaya Co-operative Apex Bank Ummulong Branch, ma E.M.H Passah Working President ka WJDSA, u Bah Damian S War, Waheh Shnong ka Namdong-B, ki nongkitkam ka WJDSA nalor kiwei de.
Ka jingïakhun phainal, ha ka liang ki kynthei ka Tome Memorial Higher Secondary School, Jowai kala ïoh ban rah ïa ka nam lahduh da kaba jop 43:14 Point ïaka JNV School Mukhla,
Katba haka liang ki shynrang ka Thomas Jones Higher Secondary School kala jop da 44:28 Point ïa ka Tome Memorial Higher Secondary School, Jowai.
Ïa ki khusnam sha ki nongjop la sam da u kongsan jong kane ka sngi ha ryngkat kiwei de ki riew rangbah kiba la wan sakhi ïa kane ka sngi pynkut.
