SHILLONG, Nailar 23: Ka St Mary’s School bad ka St Edmunds School, ki la long ki lahduh ha ka lympung ïalehkai phutbol kyrpang ia ki khynnah kynthei bad shynrang kiba dang hapoh 14 snem kaba la tip da ka Rangdajied United Football Club Under 14 Football Championship 2024, ba la pynhap pyrda noh ha ka Sngi Thohdieng.
Haba phai sha ka jingïakhun ïa ka phainal hynne ka Sngi Thohdieng, na ka liang ki kynthei, ka St mary’s ka la lah ban pynliem noh ïa ka Pine Mount ban long ka lahduh.
Katba ha ka liang ki shynrang, ka St Edmunds ki la lah ban pynliem noh ïa ka O.M Roys Memorial School ban rah ïa ka namlahduh.
Ha kane ka sngi pynhap pyrda la don ryngkatlang ka Kong Isawanda Laloo- IAS, Secretary jong ka Sports and youth Affairs ka sorkar jylla, kum ka kongsan ha ryngkat u rangïalehkai phutbol ba la shongthait bad ba bna nam ka jylla – u Bah Augustine Kharkongor.
Nangta kiwei de kiba la donlang ha kane ka sngi ki kynthup ïa ka Ri-Iohlang Dhar, ka referee kynthei ba nyngkong jong ka jylla kaba la shah jied tang marwei na India ban don bynta ha ka ban pyniaid ïa ki jingïalehkai ka lympung Fifa Women’s U-17 World Cup.
Kane ka lympung la sdang naduh 19 tarik u Nailar, 2024
bad la pynlong ha Rangdajied Performance Centre,Pynthorbah.
