Shillong, Nailur 21: Ka St Edmund ISC bad ka St Mary’s HSS ki la ïohrah ïa ka nam lahduh na ka liang ki shynrang bad kynthei ha ka lympung ïalehkai jong ka ‘Shillong Inter School Basketball Tournament 2025’ kaba la long ha madan Basketball jong ka Pearly Dew Higher Secondary School, ha Jaiaw Laitdom.
Namar ba ki don tang ar tylli ki kynhun kynthei ba rung ha kane ka lympung, baroh ar ki la rung beit beit sha ka final ha kaba ka St Mary’s HSS ka la pynliem noh ïa ka Mylliem Presbyterian Secondary School ha ka jingïakhun kaba noh shiliang da 42-4, ha kaba ka Rimesha ka la kamai 14 poiñ marwei na ka bynta ka St Mary’s.
Katba ha ka liang jong ki shynrang ki don 8 tylli ki kynhun kiba la rung sha kane ka lympung bad la phiah ïa ki ha ki ar tylli ki Group (A & B), bad jia ryngkhat ka St Edmund bad ka Mizo Modern kiba dei na kajuh ka Group ki la ïohrung sha ka final.
La ïoh ban pyndep ïa ki ar tylli ki semi final ha kane kajuh ka sngi, ha kaba ka St Edmund ka la pynliem noh ïa ka Little Flower HSS da 60-52. U A. Mawthoh u la noh synñiang jan shiteng na ki poiñ jong ka St Edmund da kaba thep 29 basket, katba u M Mawrie (17) bad u G Kharbuki (13) ki dei ki rangïalehkai kiba la synniang bun tam na ka bynta ka Little Flower.
Ka Semi final kaba ar la ïohi ïa ka Mizo Modern kaba la pynliem noh da ka said ïa ka Jaiaw Presbyterian HSS da 38-31.
Haba phai pat sha ka jingïakhun ïa ka Final ka St Edmund ka la rah ïa ka nam lahduh da kaba pynliem noh da 54 la 38 ïa ka Mizo Modern. Kiba la noh synñiang borbah ïa ka St Edmund ki long u A Mawthoh (18 poiñ) bad u D Kharbuki (13 poiñ), katba u Ishan u la kamai 14 poiñ na ka bynta ka Mizo Modern.
La wan sakhi lang ïa ka Final da katto katne ngut ki riew pawkhmat, kynthup ïa ka Kong Sanbha Mawlong, Superintendent, PWD (R & B Secretariat Branch), kum ka Kongsan, u Bah Jefferey, Professional Strength & Conditioning Coach, uba dei u nongïalehkai barim ba la mihkhmat ïa ka Meghalaya kym u Symbud Kongsan, nangta ki dkhot nongïalam ba la rangbah jong ka Meghalaya Basketball Association kumjuh ruh na ka East Khasi Hills District Basketball Association.
Baroh ar tylli ki kynhun lahduh (shynrang & kynthei) ki la ïohpdiang ïa ka khusnam pisa kaba T.20,000, katba ki ar tylli ki kynhun kiba wan ba-ar ki la khur T.10,000. La ïoh ruh ban sam khusnam sha ki ar ngut ki nongïalehkai ba kynsai tam (Most Valuable Player), ha kaba na ka liang jong ki shynrang la khur da u Gedion Kharbuki jong ka Little Flower, katba ka Phibandarijanai Lamare na Mylliem Presbyterian ka la khur na ki kynthei.
Na ka liang jong ka DUBAKH Sports Pvt Ltd, kaba pynïaid ïa kane ka lympung, ka la pynpaw ïa ka jingsngewnguh kaba khraw ïa baroh ki skul kiba ïashim bynta, ki nongïalehkai, ki referee, ki nongpynïaid bad ki nongkyrshan na ka bynta ka jingkyrshan ba kordor jong ki ban pynlong ïa kane ka lympung kaba jop.
“Ka jingdon ryngkat jong ki kmie ki kpa bad ki nongkyrshan ha baroh kawei ka lympung ka la nang pynshongshit ïa kane ka lympung,” ka la bynrap.
Ka Shillong Inter School Basketball Tournament 2025 sa shisien ka la pynshisha ba ka dei ka rynsan kaba kordor ban saiñdur ïa ka sap ïalehkai basketball hapdeng ki khynnah samla, ha kajuh ka por ban pynroi ïa ka jinglong ryntih bad ban tei ïa ka kolshor ïalehkai kaba khlaiñ ha ka jylla Meghalaya.
