Lahduh ka St. Anthony’s, Ïewrynghep SS bad RC Evening School ïa ka State Level Subroto Mukherjee Cup Football 2022

Shillong, Naitung 31 : Ka St. Anthony’s HSS, ka Ïewrynghep SS bad ka Roman Catholic Evening School ki la ïoh rah ïa ka nam lahduh jong ka lympung ïalehkai State Level Subroto Mukherjee Cup Football Tournament 2022 ba la pynïaid da ka tnad Sports and Youth Affairs jong ka Sorkar jylla.
Ïa katei ka lympung la wan ban pynhap pyrda noh da u Dr Vijay Kumar, IAS Commissioner Secretary ka tnad Sports and Youth Affairs ha ka jingïalehkai ba la pynlong ha madan jong ka SAI ha NEHU ha ka jingsakhi lang ka Kong WAM Booth, Director Sports and Youth Affairs, Working President bad General Secretary ka MSOA Bah John F Kharshiing bad Bah Finly L Pariat, ki DSO, ki coach bad ki khynnah skul kiba la wan ban kyrshan ïa la ki jong ki skul.
Haba phai sha ki jingïalehkai final jong ki khynnah shynrang U-17, ka St Anthony’s Higher SS jong ka East Khasi Hills District ka la pynliem salit da 1-0 ïa ka Sibsingh Memorial Govt Higher SS kaba la mihkhmat na Wet Khasi Hills District. Ïa katei ka shi kol la thep da u Blanangshngaiñ Khong-sdam ha ka minit ba 11 jong ka jingïalehkai.
Ha ka jingïakhun final U-17 ki kynthei, ka Ïewrynghep Secondary School jong ka East Khasi Hills Dstrict ka la pynliem da 2-1 kol ïa ka Sati Raja Secondary School jong ka Ri Bhoi District. Ïa ki ar kol na bynta ka Ïewrynghep SS la thep da ka Madjingsuk Basaïawmoit ha ka minit ba 17 bad ka M. Songthiang ha ka minit ba 50 katba ïa ka shi kol na bynta ka Sati Raja la thep da ka Kynrohbaskhem Shylla ha ka minit ba 13 jong ka jingïalehkai.
Katba ha ka jingïakhun final U-14 ki shynrang ka Roman Catholic Evening School jong ka West Jaiñtia Hills District ka la pynliem ïa ka New nongstoiñ Secondary School jong ka West Khasi Hills District lyngba ka tie breaker da 4-3.
Ha kaba kut jong ka jingïalehkai la sam ruh ïa ki khusnam ba kyrpang. Kiba la khur ïa ka nam Best Goalkeeper jong ka U-14 (Boys) la ïoh da u Idamaïalang Pyrtuh jong ka RC Evening School, WJHD, Player of the Tournament la ïoh da u Richanmi O Lyngdoh jong ka RC Evening School.
Ha ka U-17 ki kynthei ïa ka nam Best Goalkeeper la ïoh da ka Ribansi Jamu jong ka Sati Raja SS, Ri Bhoi District, Player of the Tournament la ïoh da ka Magritia Songthiang jong ka Ïewrynghep SS, katba ha ka U-17 jong ki shynrang ïa ka nam Best Goalkeeper la ïoh da u Bashaibok Sohshang jong ka Sibsingh Memorial Govt HSS, Player of the Tournament la ïoh da u S. Pamthied jong ka St Anthony’s HSS.