Shillong, Jylliew 27: Ka St. Anthony Higher Secondary School, Shillong ka ïohrah ïa ka namlahduh hadien ba ka la lah ban pynliem ïa ka OM Roy HSS da 2-1 ha ka Final phutbol jong u Tirot Sing Syiem Mawlai Inter School Football Knock Out Tournament 2022 ba la pynïaid da ka HYC Mawlai Umjaiut Unit ha madan heh mini Stadium, Mawlai Phudmuri hynne ka Lah sngi U Blei.
Ka HYC Umjaiur ka la pynlong ïa kane ka lympung ïalehkai phutbol ryngkat ka motto, Ong hooid ïa ka Sports bad em ïa u Drok ne Say Yes to Sports and No to Drugs.
Ha ka jingïakhun jong ka kyllastep ka la kut ha ka jingïakhaid, hynrei ynda la wanphai ha ka kyllamiet u Sambor Mangkara Sun, u la ïoh pynkhih jar nyngkong ha ka 31 minit bad u Basuklang Bina ïa ka kol kaba ar ha ka 45 minit. Shuwa ban wai artad ka OM Roy ka la ïoh ïa ka Penalty ba la thep da u Kolanstone Khongji ha ka 48 minit jong ka jingïakhun.
Ka St. Anthony HSS kum ka lahduh ka la ïohrah ïa ka song Pisa ba 20,000 tyngka ryngkat ka trophy bad ka OM Roy HSS kaba la wan baar ka la ïoh ïa ka song ba 10,000 tyngka bad ka trophy.
Ha kane ka sngi la la sam ruh ïa ki khusnam shimet, ki ar ngut na ka St. Anthony HSS u Damebanker Lyngdoh u la ïoh khur ïa ka nam Best Player bad u Donkupar Ryntathiang kum u Best Goalkeeper, katba ïa ka nam top scorer ka la leit sha u Kolanstone Khongji ka OM Roy. Ia ka song pisa bad ka trophy sha ki nongjop la sam da u kongsan bah PT Sawkmie bad sha kaba wan ba ar da u Donboklang Kharlyngdoh, president ka HYC Mawlai Circle.
Hashuwa kane haba ai jingkren u bah Sawkmie u la dawa ba dei ban kem mardor ïa kito ki briew kiba pynshlur ïa ki khynnah bad samla ban dih drok. U kyntu jur ïa ki paidbah ba kin pyntip mardor sha ki bor shnong bad ki bor bahalor lada tip bad ithuh ïa kum kine ki briew kiba pynbor ïa ki khynnah bad samla ban dih drok, namar ka imlang sahlang ka la jot na kadaw jong u drok.
U la pynpaw ruh ïa ka jingsngewbynñiaw kaba jur bha ba bun ki khynnah kiba 13, 14 snem shaneng ki la ngop ha ka jingdih drok bad u banjur ïa ki khynnah bad khun samla ba horkit hordang ba kim dei ban ktah ïa u drok. La ïoh ruh ïa ka jingkren na u Bah Donboklang ha kane ka sngi.
Hashuwa kane ka la don ruh ka jingïalehnai paralok, ïa kaba ka HYC Mawlai ka la jop ïa ka HYC Umjaiur.
