Lahduh ka St Anthony’s HSS bad ka Auxilium Girls’ HSS ha ka 31st Inter School Karate Tournament

Shillong, Naitung 28: Ka St Anthony’s Higher Secondary School ka la ïai bteng ban bat ïa ka burom lahduh ha ka liang ki kynhun shynrang (Boys’ Team) ha ka lympung ïalehkai Karate kaba la tip da ka 31st Inter School Karate Tournament 2025, kaba la pynkut ha ka sngi Saitjaiñ jong ka taïew ba ladep.
Mynta u snem ka nam lahduh jong ki kynthei (Girls’ Team Champion) ka la leit sha ka Auxilium Girls’ Higher Secondary School. Ka St Anthony’s Lower Primary School ka la wan ha ka kyrdan ba-ar na ka bynta ki khynnah shynrang katba ka Providence School ka la wan kyrdan ba-ar na ka bynta ki khynnah kynthei.
Kane ka lympung kaba lai sngi lynter la pynlong da ka All Meghalaya Karate-Do Association [AMKA] naduh ka 24 tarik haduh 26 tarik Naitung, ryngkat ka jingkyrshan jong ka Directorate of Sports and Youth Affairs, bad la pynlong ïa ka ha Multipurpose Indoor Hall, SAI, NEHU Shillong.
Mynta u snem la sakhi ïa ka ïa ka rekod jingbun ki nongïashim bynta, kaba la kynjoh haduh 748 ngut ki nongïalehkai karate kiba la thep kyrteng na ki 104 tylli ki skul na Khasi-Jaiñtia Hills bad Garo Hills. Watla ka long kaba eh ïa ki nongpynïaid ban pynbit pynbiang ïa kiba bun ki nongïalehkai karate, hynrei ka AMKA da ka jingsngur mynsiem ka la pynthikna ba uwei pa uwei u khynnah ïalehkai naduh kiba 6 snem shaneng kin ïoh ïa ka lad ban sei madan ïa ka sap.
Ha kane ka sngi pynhap pyrda ïa kane ka lympung la wan Kongsan da u Bah Paul Lyngdoh, Myntri ka tnat jngohkai jong ka Sorkar Jylla, ha ka jingïadonlang ar ngut ki symbud Kongsan – u Bah Finely L Pariat – General Secretary ka Meghalaya State Olympic Association bad u Aiborlang Shabong – Chief Accounts Officer jong ka Meghalaya Energy Corporation Ltd.
Kine ki kongsan ki la sam ïa ki khusnam sha ka kynhun lahduh bad kumjuh ruh ïa ki khusnam shimet na ka bynta ki nongïalehkai Karate ba kynsai jong ki khynnah shynrang bad kynthei kiba la tyngshaiñ bha ha la ki jong ki kyrdan.
U Bah Paul Lyngdoh u la wan phai da ka jingsngewhun ban sakhi ïa ka sap ba la pyni da ki nongïalehkai karate ha ki jingïalehkai ba khatduh bad u la ong ba u thikna ba kin sa ïoh khur ïa ki takma na ka bynta ka Meghalaya bad ruh ïa ka India ha ki por ban wan.
Nalor ka khusnam lahduh sha ki kynhun u Royal Jayden Laloo (Seven Set Higher Secondary School) u la khur ïa ka khusnam Best Karateka ha ka kyrdan Junior jong ki shynrang, katba ka Princey A Blah Pohti (Pine Mount School) ka la ïoh ïa kane ka khusnam ha ka liang ki kynthei.
Ha ka kyrdan kiba la rangbah jong ki shynrang (Boys Senior) ka khusnam Best Karateka ka la leit sha u Daniel Dabiangbha Warjri jong ka St Anthony’s HS School, katba ka Iwannaki L Khongji jong ka St Anthony’s HS School ka la khur na ka liang ki kynthei.