Mawkyrwat, Jymmang, 31: Ka SP Office Cricket Team ka la long ka nongjop ha ka 2nd Inter-Office T20 Cricket Tournament 2023 kaba la pynïaid da ka South West Khasi Hills District Cricket Association (SWKHCA) ha ryngkat ka jingïatreilang bad ka ophis u District Sports Officer, South West Khasi Hills District hadien ba ka la pynliem noh ïa ka Ranikor Cricket Club da 53 runs ha ka jingïalehkai phainal kaba la long ha Madan Motmeron, Jakrem, South West Khasi Hills District.
Haba phai sha ka jingïalehkai phainal hapdeng ki ar kynhun, ka Ranikor CC ka la jop ïa ka toss bad ka la phah tied nyngkong ïa ka SP CT ha kaba ka la buh target haduh 170 run na ki 20 overs bad hap noh 6 tylli ki wikets.
Ki nongtied kiba la ïoh bun ron tam ki dei u Jumbu W. Marak bad u Donkupar Lyngkhoi kiba la tied 63 ron bad 61 ron katba na ki nongbol ka Ranikor CC u Walseng Marak bad u Josim Ch. Marak ki la ïoh ban khur mar 2 wikets.
Ha ka pali ban beh ïa ka thong, ka Ranikor CC ka la lah ban tied 112 run bad hap noh baroh ki wikets na ki 18.5 overs. U Josim Ch. Marak jong ka Ranikor CC u la lah ban kamai 33 run katba ki nongbol ka SP ophis CT, u Rishort Lyngdoh, u Donkupar Lyngkhoi bad u Sachin Mohato ki la ïoh khur mar 2 wikets.
Ïa ka khusam u ‘rangïalehkai ba tbit ha ka jingïalehkai phainal ka leit sha u Jembo Marak uba la kamai 63 ron na ki 49 bol bad 1 wiket bad ïa ka khusnam ‘rangïalehkai ba tbit jong lympung baroh kawei ka leit sha u Boney Sohtun uba la ïoh ban kamai 248 run bad kumjuh ruh u la ïoh ruh ïa ka khusnam man of the series ha kaba u la ïoh 248 ruh bad 11 wikets ha baroh kawei ka lympung katba u Steveson Syiem u la ïoh ïa ka nam ba ïoh bun ki wiket da 13 wikets bad baroh kine ki dei jong ka SP Office Cricket Team.
Ki kynhun kiba la wan ban ïashimbynta ha kane 2nd Inter-Office T20 Cricket Tournament 2023 ki don baroh 19 tylli ki kynhun.
Ïa kane ka lympung ïalehkai kriket jong ka 2nd Inter-Office T20 Cricket Tournament 2023 la wan ban khylliap pyrda da u bah T. Lyngwa, IAS, Deputy Commissioner, South West Khasi Hills District kum u kongsan ha ryngkat ka jingïadonlang u bah B.J. Kharshandi, Sub Divisional Officer (SDO) barim jong ka Ranikor Civil Sub Division, lem bad kiwei de ki ophisar sorkar bad ki nongpeitkai bad ki nongkyrshan jong ki ar tylli ki kynhun.
Ha kane ka sngi la ïoh ruh ban sam ïa ki khusnam ha ryngkat ka song pisa sha baroh ar kynhun kaba la poi sha ka thong jong ka jingjop bad kumjuh ruh ka kynhun kaba la shah rem noh ha ka phainal.
