Shillong, Rymphang 27: Ka bynta kaba 4 jong ka lympung Assam Rifles Sentinels Cup Football Tournament (Men & Women) 2026 ka la kut noh ha ka 27 tarik Rymphang 2026 (sngi Thohdieng), ha kaba ka Smit SC ka la rah ïa ka nam lahduh ha ka liang ki shynrang, katba ka Assam Rifles FT ka la jop ha ka liang ki kynthei.
Da ka jingpynkut ïa ka bynta kaba 4 ka Assam Rifles ka la ïoh ban jam sa ïa uwei pat u mawjam ha ka jingpyrshang ban kyntiew ïa ki kam ïalehkai bad ka jingïashim bynta jong ki samla ha ka thaiñ shatei lammihngi.
Kane ka lympung ka la sdang naduh ka 17 tarik Rymphang bad la pynlong ïa ki jingïalehkai ha ki jaka bapher bapher ha kylleng ka nongbah Shillong, ha kaba la sakhi ïa ka jingïashim bynta kaba shitrhem naki kynhun ïalehkai phutbol bapher bapher jong ka jylla Meghalaya, ha ryngkat ki kynhun jong ka Assam Rifles, Indian Army bad Meghalaya Police bad kumjuh ruh ka jingkyrshan kaba radbah na ki riew ieid phutbol ha kylleng ka thaiñ.
Ka jingïakhun phainal ha liang ki shynrang, la ïohi ïa ka Smit SC kaba la pynliem noh ïa ka Assam Rifles FT ban pynskhem ïa ka nam lahduh; katba ka Assam Rifles FT ka la pynliem noh ïa ka Laitkor SC ha ka phainal jong ki kynthei.
Kum ki lahduh ka Smit SC (shynrang) bad ka Assam Rifles FT (kynthei) ki la ïoh khur ïa ka khusnam pisa kaba Lai lak tyngka ryngkat bad Assam Rifles Sentinels Cup Trophy. Kiba wan ba ar ha baroh ar tylli ki thup ki la ïoh ïa ka khusnam pisa kaba mar ar lak tyngka.
La wan sakhi ïa ka phainal da u Lt Gen Vikas Lakhera, AVSM, SM, DG Assam Rifles kum u Kongsan, ha ka jingïadon lang ruh ki ophisar jong ka Assam Rifles, ki kynrem ki lyndan, ki ophisar jong ka tnad ïalehkai bad ki nongpeitkai.
Kumba ka paw ka Sentinels Cup ka dang bteng ban pyni ïa ka jingkut jingmut jong ka Assam Rifles ban long ‘Ki paralok jong ka thaiñ shatei lammihngi’, da kaba pyndonkam ïa ka kam ïalehkai kum ka atiar kaba donbor ban ai mynsiem ïa ki samla ban kiar ïa ki kam lehnoh bad ka jingdih drok katba ka ïalam lynti ïa ki sha ki kam kiba bha.
