Shillong: Ka kynhun Shipara FC ka la long ka lahduh ban ïoh khur ïa ka khusnam ha ka lympung ïalehkai Independence Penalty Cup da kaba pynliem noh ïa ka kynhun K.D Gangsta kaba la long ha 15 tarik u Nailar, 2022 ha Madan Heh Mini Stadium ha Mawlai Phudmuri, Shillong.
Ha kane ka jingïalehkai ba la bei jingïarap pisa da u Michael Kharsyntiew la sakhi lang da u State Vice President jong ka BJP Meghalaya State Unit u Bah David kharsati uba la long kum u Kongsan ryngkat ka jingsakhi lang jong u Bah Michael Kharsyntiew kum u Symbud Kongsan, u Rangbah Shnong jong ka Mawlai Mawdatbaki u Bah BR Kharmujai, ki Rangbah Dong kiba kynthup ïa u Bah Lebi R. Kharbuli bad u Bah Eddie Dkhar, ki nongïalam jong ka Seng Samla shnong , ki longkmie bad ki Samla na ki dong jong ka Mawlai.
La sdang ïa kane ka jingïalehkai da kaba pynher ïa ka lama lai rong jong ka ri da u Bah Michael Kharsyntiew ryngkat ka jingsakhi lang jong ki samla ka shnong Mawlai Mongmali.
Ha kane ka jingïakhun, ki don baroh 32 tylli ki kynhun kiba la ïashim bynta na ka North Shillong Constituency ba kynthup ruh ïa ki kynhun ïalehkai na ka KSU Jaïaw Circle, KSU Mawlai Circle, HYC Central Body bad ar tylli ki kynhun na ka H. Gordon Roberts Hospital, Jaïaw.
