Lahduh ka Shillong College bad St. Anthony’s College ïa ka NEHU Inter College Indoor Tournament 2023
Shillong, Naittung 20: Hynne ka Sngi Palei na ka liang jong ka tnat kaba dei khmih ïa ka kam lehkai (Sports Department) jong ka North-Eastern Hill University ka la ïoh ban khylliap pyrda noh ïa ka lympung lehkai kaba la tip da ka NEHU Inter College Badminton kynthei bad shynrang (Men & Women) bad ruh ïa ka jingïalehkai Table Tennis kynthei bad shynrang (Men & Women).
Kumban shu pynkynmaw, ka ka tnat kaba dei khmih ïa ka kam lehkai (Sports Department) jong ka NEHU ka la ïoh ban pynlong ïa kane ka Tournament dei naduh ka18 tarik mynta u bnai bad la ïoh ban pynkut noh hynne ka Sngi Palei, ka 20 tarik bad ïa ki jingïalehkai la pynlong ha Indoor Stadium, jong ka NEHU Permanent Campus, Shillong.
Shuh shuh , ïa kane ka tournament la pynlong khnang na ka bynta ki samla pule jong katei ka skulbah (University) bad ruh ïa ki samla na kiwei pat ki jaka pule (college). Shuwa ban jam sha kaba kut jong kane ka lympung la ïoh ban pynlong ïa ka prokram, ha kaba u Prof. K. Debberma, u khliehduh jong ka tnat School of Social Sciences, NEHU u la don bynta ha kane ka prokram kum u kongsan. Katvba u Prof. L. Kma, Director In-charge ryngkat bad u Shri N. Das, Asst. Director (Physical Education & Sports) u ba dei u wei na ki dkhot ba pynïaid ïa kane a lympung lehkai ki la ïoh ban ïadonbyntalang ha katei ka sngi bad ïoh bynta ban sam ïa ki khusnam sha ki nongjop.
Haba phai sha ka jingïakhun ha ka thup jong ki shynrang jong ka Badminton ïa ka namjop la khur da ki samla pule jong ka Shillong College katba ka Kiang Nangbah Govt. College kaba na Jowai ka la wan ha ka kyrdan ba ar.
Haba phai pat sha ka jingïalehkai Badminton jong ki kynthei (Women), ki samla pule jong ka St. Anthony’s College, Shillong ki la ïoh ban wan ha ka kyrdan ba nyngkong, bad ïa ka nam ba ar da ki samla kynthei jong ka Shillong College.
Ha ka jingïalehkai Table Tennis jong ki shynrang, ki samla pule na ka skulbah NEHU, Shillong ki la ïoh ban khur namlahduh katba ka St. Anthony’s College, Shillong ka la wan ha ka kyrdan ba ar.
Khadduh, ha ka jingïaknieh namlahduh ha ka Table Tennis jong ki kynthei (Women), sa shi sien pat ka burom ka leit sha ka Shillong College, hadien ba ki thei lehkai jong kane College ki la wan ha ka kyrdan ba hakhmat, bad ka NEHU, Shillong ka la wan ha ka kyrdan ba ar.