SHILLONG, Jylliew 15: Kumba la long ha u snem ba ladep ka Meghalaya Veteran Table Tennis Association [MVTTA], ka la pynlong ïa ka lympung ïalehkai Teble Tennis kaba la tip da ka 7th Meghalaya Masters Table Tennis Team Championships ban kynmaw burom ïa ka sngi pynneh pynsah ïa ka mariang ha ka pyrthei lane ka World Environment Day.
Kane ka dei ka sien pynlong kaba 7 jong kane ka lympung ha Polo Stadium Shillong ha ka sngi Saitjaiñ, 14 tarik u Jylliew 2025. Ha kane ka lympung baroh ki nongïalehkai Table Tennis jong ki snem ba mynshwa kiba la tip ïa ki kum ki Masters na ki District bapher bapher jong ka Jylla Meghalaya ki la ïashim bynta kum ki 8 tylli ki kynhun ba la phiah ha ar tylli ki Group.
Kine ki 8 tylli ki kynhun ki kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ïa kane ka jingsam khusnam la pynlong ha ka por 5 shiteng jan miet ha ka 14 tarik Jylliew, 2025 ha khmat u Nababrata Bhattacharjee uba la wan kum u Kongsan, nangta u symbud kongsan B L Narry Hony Secretary Meghalaya TT Associations.
Ka kynhun jong ka Save Trees ba la ïalam da u Sarwan Gareri kum u kapten, ryngkat bad u Ranjan Deb, Ridip Gogoi, Michael Francis bad u Jayant P Rao ki la long ki lahduh jong mynta u snem. Ka Go Green ba kynthup ïa u Kyrshan Ranee kum u kapten, u W Zimik, S Pyngrope, Bishnu P Joshi bad u Kiran Thapa ki la wan ba-ar (Runner up).
Katba ïa ka nam Best Player of the Tournament la khur da u Arup Nag jong ka Save fuel na Tura.
