Shillong, Nailar 30: Ka Rangdajied United sports Development Society ha ka 29 tarik Nailar, 2025 kaba hap ha ka sngi Thohdieng ka la ïoh ban pynhap pyrda noh ïa ka lympung kynjatbol jong ki khynnah shynrang bad kynthei kaba la tip da ka 2nd Under-14 Inter School Tournament 2025.
Kane ka lympung ba la pynlong ha Randajied United FC Performance Center, Pynthorbah, ka la ïaid san sngi lynter ha kaba la sdang naduh ka 25-Nailar-2025. Mynta u snem ki la don haduh 12 tylli ki skul kiba la shim bynta ha ka kyrdan ïalehkai jong ki shynrang bad saw tylli ki kynhun ha ka kyrdan ïalehkai jong ki kynthei.
La wan sakhi ïa ka jingïakhun final da u wei na ki khlur ïalehkai ka jylla uba mih madan ïa ka NEUFC kaba la rah ïa ka Durand Cup 2015, u Redeem Tlang kum u Kongsan ha ka jingïadon lang u khlur ïalehkai barim ka jylla u Bah Eugeneson Lyngdoh bad u Bah Carson kum ki symbud Kongsan.
Mynta ka kynti ki thei ïalehkai ka Pinemount School ki la ïohrah ïa ka nam lahduh ha ka liang ki kynthei da kaba pynliem noh ïa ka St Marys. Katba ka OM Roy Memorial School ki la rah ïa ka nam lahduh ha ka liang ki shynrang da kaba pynliem noh ïa ka Umpohliew Jingtip School.
Shuwa ban sam ïa ki khusnam sha ki kynhun lahduh la ïoh ka jingkren lyngkot na u Redeem Tlang, uba la ai khublei ïa baroh ar tylli ki kynhun ba la rah ïa ka nam lahduh ha kajuh ka por ban ai mynsiem ïa ki kynhun kiba la shah rem noh ha kane ka final, ba kim dei ban duh jingkyrmen, hynrei ban shim ïa kane kum ka jinghikai ba nang trei shitom ha ki sngi ban wan.
“Thmu kham shalor, wat lada phi jop mynta ka sngi, ka dang don ka jingkieng kaba phi hap ban kiew lashai,” ong u Redeem Tlang.
Nalor ki kynhun lahduh la ioh ruh ban sam khusnam shimet ha kaba ïa ka Golden Glove la khur da ka Manbha Warbah [(Girls) Pinemount] bad u Rohit Masynting [(Boys) OM Roy], nangta ïa ka Golden Boots la khur da ka Marley Lhingchamkim [(Girls) St Mary’s School] bad u Shiborlang Dkhar [(boy) OM Roy Memorial].
ïa ka khusnam Player of the Tournament la khur da ka Maya Adella Mawlieh [(girls)Pinemount], bad u Antonio Nongrum [(boys) Umpohliew Jingtip].
