Lahduh ka OM Roy, St Anthony’s bad Shillong College ïa ka Inter School & Inter College Karate
Shillong, Nailar 14 : Ka OM Roy Memorial Secondary School, St Anthony’s LP School bad ka Shillong College ki la ïoh khur ïa ka nam lahduh ha ka lympung ïalehkai karate kaba la tip kum ka 28th Inter School & 10th Inter College Karate Tournament 2022, kaba la poi noh sha kaba kut ha ka sngi Saitjaiñ ha Laban.
Ïa katei ka lympung ba lai sngi ba la pynïaid da ka All Meghalaya Karate-do Association (AMKA) ba la pynlong ha Laban SC Indoor Stadium ki la don haduh 300 ngut ki karatekas na ki 45 tylli ki skul bad hynriew tylli ki college kiba la wan ban ïashim bynta.
Ka skul ha ka liang ki kynthei la jop nam lahduh da ka OM Roy, kaba la jop saw tylli ki takma ksiar, lai tylli ki takma rupa bad lai tylli ki takma rnong, katba ka Kiddies Corner Secondary School ka wan ba ar da kaba khur lai tylli ki takma ksiar bad lai ki takma rnong.
Ka St Anthony’s LP School ka khur saw tylli ki takma ksiar, ar ki takma rupa bad phra tylli ki takma rnong kaba dei ha ka liang ki shynrang, ka Providence School kaba wan ba ar ka khur saw tylli ki takma ksiar, ar ki takma rupa bad saw tylli ki takma rnong.
Haba phai sha ka jingïakhun hapdeng ki college, ka Shillong College ka wan ha ka kyrdan ba nyngkong bad khur ïa ka nam lahduh da kaba jop lai tylli ki takma ksiar, lai ki takma rupa bad hynñiew tylli ki takma rnong, katba ka St Edmund’s ka wan ba ar da kaba khur lai tylli ki takma ksiar bad kawei ka takma rupa.
Ïa katei ka tournament la plie pyrda da u Bah Ransom Sutnga uba dei u President jong ka Mawkhar SC ha ka jingdonlang u Bah Finely L Pariat General Secretary ka Meghalaya State Olympic Association (MSOA). Katba u Bah John F Kharshiing uba dei u Working President jong ka MSOA u la pynhap pyrda noh ha ka jingdonlang u Bah Dipshon Ryntathiang dkhot jong ka MSOA, ki nongkitkam ka AMKA bad kiwei kiwei.
Haba phai sha ki khusnam shimet ba kynthup ïa ka nam Best Karateka, ha ka liang ki shynrang jong ka kyrdan senior la ïoh da u Cheltis Shylla (Providence School)
ha ka kyrdan ki Junior la ïoh da u Eric B Ryngnga (St Anthony’s LP School), katba ha ka liang ki kynthei jong ka kyrdan Senior la ïph da ka Rebeka Nongspung (Providence School) bad ha ka liang ki Junior la ïoh rah da ka Emika D Myrthong (BK Bajoria School).