Shillong, Nailar 13: Ka O.M Roy Memorial Higher Secondary School ka la ïoh ban rah ïa ka nam lahduh ha ka lympung ïalehkai phutbol ba la pynlong da ka Hynñiewtrep Youth Council (HYC) Mawlai Circle, ïa kaba la tip da ka ‘1st Tur Shaphrang Knockout Football Tournament 2025’.
Kane ka lympung kaba la pynhap pyrda noh haka 13 tarik Nailar, 2025 jong ka sngi Balang la sakhi ïa ka O.M Roy Memorial Higher Secondary School kaba la pynliem noh ïa ka Shillong College da 4-1 kol ha ka jingïakhun ïa ka phainal ha madan Heh Mini Stadium, Mawlai Phudmuri.
Ha kane ka sngi pynhap pyrda la ïadon lang u President HYC Sengkmie u Bah Roy Kupar Synrem kum u kongsan, kumjuh u Vice President Bah Donboklang Kharlyngdoh bad kiwei kiwei ki dkhot jong ka Mawlai Circle.
Ka jingthmu ïa ka jingpynlong ïa kane ka lympung ka long shi bynta ban ïakhun pyrshah ïa u drok uba la kynrei bha ha ka Jylla bad ban pynshlur ïa ki khynnah samla ba kin pynmlien ïalade ha ki jingïalehkai kum ka phutbol.
Kane ka lympung ka la sakhi ïa ka jingwan shim bynta da 13 tylli ki kynhun ïalehkai na ki skul bapher bapher kiba na kane ka nongbah lem bad ki jaka ba marjan kynthup ïa kawei ka kynhun kaba naduh Mawsahew.
Kum ka lahduh ka OM Roy ka la ïohpdiang ïa ka song khusnam kaba T.30,000 hajar tyngka ryngkat ka trophy, katba ka Shillong College ka la ïoh ïa ka khusnam pisa kaba T. 20,000 hajar ryngkat ka trophy.
Nalor ki khusnam sha ka kynhun ki la don ruh ki khusnam shimet sha ki rangïalehkai ba kynsai, ha kaba la khur lut da ki rangïalehkai jong ka O.M Roy. U Comfort Kharbani u la ïohpdiang ïa ka nam Best Goalkeeper, nangta ka khusnam Best Player ka leit sha u Mebanlamlynti Masharing bad Top scorer sha u Samborlang Langte.
