SHILLONG, Jylliew 12: Ka O.M. Roy Memorial Higher Secondary School ka la rah ïa ka nam lahduh ha ka kyrdan ïalehkai ki shynrang ba hapoh 17 snem (U-17) jong ka District Level Inter School Subroto Cup Football Tournament 2025, hadien ba ki la jop ïa ka phainal pyrshah ïa ka Shillong Vidhyalaya Secondary School hynne ka sngi thohdieng ha madan SAI, NEHU, Shillong.
Ha kane ka jingïakhun la sakhi ïa ka O.M. Roy Memorial HSS kaba la wanphai nadien ban pynkhih ïa ki ar tylli ki kol ba kongsan ban jop ïa ka final da 2-1 kol.
Tang katto katne minit ba la ïaid ka por ka Shillong Vidhyalaya ka la ïoh ban lamkhmat lyngba ka kol jong u Kitbok Maskut (14’min). Hynrei kane kam shym la pynduh jingkyrmen satia ïa ki khynnah ïalehkai jong ka O.M. Roy Memorial HSS ha kaba u Jonathan Kharbani u la pynïakhaid ha ka minit kaba 35 shuwa ba u Marbiang Kharbhih un pynkhih ïa ka kol kaba kongsan ha ka 51 minit ban khur ïa ka jingjop.
Kum ka lahduh jong kane ka lympung ba la pynïaid da ka shlem treikam jong u District Sports Officer [DSO] ka East Khasi Hills District, ka O.M. Roy Memorial Higher Secondary School kan ïoh ïa ka lad ban dang bteng ïa ka lynti ïaid jong ka ha ka Subroto Cup Football Tournament 2025, ha kaba kan sa mihkhmat ïa ka EKHD sha ka State Level.
ïa kane ka final la wan sakhi lang ïa ka da u samla Hardy Cliff Nongbri, uwei na ki rangïalehkai ba kynsai jong ka Jylla, kum u kongsan.
Kumban shu pynkynmaw, ki kynhun ban mihkhmat ïa ka East Khasi Hills ha ka State Level Subroto Cup 2025 ki long; ka Assam Rifles ha ka Under-15 jong ki khynnah shynrang (U-15 Boys), ka Tyrsad Higher Secondary School ha ka Under-17 jong ki kynthei (U-17 Girls) bad ka O.M. Roy Memorial Higher Secondary School ha ka Under-17 jong ki shynrang (U-17 Boys).
