Shillong, Naiwieng 15: Ka North East Zone Inter University Men’s Football Tournament kaba la sdang naduh ka 11tarik Naiwieng 2024 ha Nagaland University (Headquarters Lumami) ka la kut noh ha kaba ka National Sports University (NSU) jong ka Manipur ka la ïoh ban rah ïa ka nam lahduh.
Ha kane ka lympung kaba itynnat la sakhi ïa ka Nagaland University (NU)- ka jylla kaba pdiang ïa kane ka lympung, ba kan hap khur ïa ka kyrdan kaba ar, katba ka Dibrugarh University ka la ïoh ïa ka kyrdan kaba lai. Ka Dhanamanjuri University (Manipur) kaba la ïoh ha ka kyrdan kaba saw, ka la pyndep ïa ka thup jong ki saw tylli ki kynhun ba hakhmat eh.
Ka jingkhylliap pyrda la pynlong mardor hadien ka jingïalehkai ba khatduh, ha kaba la rakhe ïa ka jingïalehkai ba itynnad jong ki kynhun bad ka la pynkut ïa ka taïew kaba pynkmen jong ka jingïalehkai phutbol.
U Deputy Commissioner ka Mokokchung u Thsuvisie Phoji uba la long kum u kongsan ha kane ka sngi u la pynpaw ka jingsngewnguh kaba khraw ïa ka Nagaland University kaba la pynlong ïa kane ka lympung ïalehkai, da kaba ai khublei ruh ïa ka jingtrei shitom bad ka jingaiti lut jong ki kynhun. U la ïaroh ïa ka mynsiem ïalehkai ba la pyni da ki skulbah kiba ïashim bynta.
U Phoji u la pynksan ruh ïa ka jingdonkam jong kum kine ki jingïalehkai ha kaba pyni ïa ka sap ïalehkai kaba khraw jong ka thaiñ Shatei Lam Mihngi, khamtam ha ka phutbol, bad u la kdew ïa ka jingjop ba pawnam jong ka thaiñ ha kaba pynmih ïa ki nongïalehkai kiba la pawnam ha ka madan ïalehkai jong ka ri bad ka pyrthei.
Ki technical officials ha kane ka jingïalehkai ki long baroh na ka Mokokchung District Football Referee Board.
Ia kane ka jingialehkai la pynlong hapoh ka jingpeit jong ka Association of Indian Universities (AIU), New Delhi. Ka jingpynlong ïa kane ka lympung ïalehkai phutbol jong ki shynrang na bynta ka North East Zone Inter University ha ka sien kaba nyngkong ka la long u mawjam ba kongsan bha na ka bynta ka Nagaland University bad na ka bynta ka jylla Nagaland.
