Shillong, Nailur 28: Ka Mylliem Lum ka la ïohrah ïa ka nam lahduh jong ka Shillong Sports Association Second Division 2025 da kaba pynliem noh ïa ka Laitkyrhong SC ha ka jingïakhun phainal da 4-3 lyngba ka jingïashut penalty ha madan First Ground-SSA Stadium, Polo, hynnin ka sngi Saitjaiñ.
Da kaba rung sha ka phainal baroh ar tylli ki klob ki la ïoh ban pynthikna ïa ka jaka ha ka lympung First Division jong ka samoi ban wan, hynrei baroh arliang ki la pynshongshit biang sa shisien ïa ki nongkyrshan jong ki ha ka jingïalehkai ba khatduh katba ki dang ïaknieh ïa ka nam lahduh bad ïa ka khusnam pisa kaba T.1 lak.
Shuwa ka phainal, ka Mylliem Lum ka la jop lut ïa baroh hynriew tylli ki jingïalehkai jong ka mynta ka samoi. Kumjuh ruh ka Laitkyrhong ruh ka khlem shah rem ha kane ka samoi, watla ka la ïakhaid ar tylli ki jingïakhun ha ka group stage.
Kane ka jingïakhun ka la pyndep ïa ka 90 minit bad ka extra time khlem da don ba lah ban pynkhihjar, watla baroh ar kynhun ki la ïoh markylliang ïa ki lad ban pynkhihjar.
Hadien ba 15 minit jong ka extra time kam shym la lah ban pynïakhlad ïa kine ki arliang mamla ka la pynbor ïa ka rai ban jam sha ka tiebreaker.
Ka Laitkyrhong ka la sdang da kaba thep ïa kaba nyngkong hynrei la shah khanglad pat ïa kaba bud ha u Baniaineh. Kaba penalty kaba saw jong ka Laitkyrhong ka la lait sharud. Ka Mylliem Lum, kaba la lah ban thep ïa baroh lai tylli ki penalty ba nyngkong, ka ladei ban pynskhem ïa ka jingjop ha ka jingpyrshang kaba saw, hynrei u Shaitborlang Kharkrang u khlem shym la lah ban pynrung, kaba la ailad ïa u Baniaineh ban thep ïa ka penalty pynjop, kaba u la lah ban pynurlong ban jop da 4-3.
Watla kata ruh, u Baniaineh u la shah jied ban khur ïa ka khusnam Player of the Final ha ka jingïalang sam khusnam. U Shaitborlang u la khur ïa ka khusnam Top Scorer na ka bynta ki 8 kol kiba u la thep ha kane ka samoi.
Ha kane ka sngi u President ka Meghalaya Football Association u Bah Hamletson Dohling u la long u kongsan, ha ka jingïadon lang ruh ki dkhot ba kham rangbah jong ka SSA. Ka Mylliem Lum ka la ïohpdiang ïa ka song khusnam kaba T.1 lak tyngka kum ka lahduh, katba ka Laitkyrhong ka la ïoh T.50 hajar tyngka.
Da ka jingpynkut ïa ka Second Division, ka SSA kan sa ïoh ban sdang noh ïa ka lympung ha ka kyrdan First Division 2025, ka ban sdang naduh kane ka sngi Nyngkong. Ka jingïalehkai kaba nyngkong kan long hapdeng ki Meghalaya Police pyrshah ïa ka Nongrah SC ha ka por 1:30 baje nohphai sngi. Hadien kane yn pynbud sa ka jingïalehkai jong ka Shillong Premier League 2025 hapdeng ka Malki pyrshah ïa ka Nangkiew Irat ha ka por 4 shiteng janmiet.
