Lahduh ka Meghalaya ha ka AMMA; wan ba ar ha ki jingïalehkai Traditional Sport
13th All India Traditional Wrestling and Pankration C’ship.
SHILLONG, Kyllalyngkot 18: Ka All Meghalaya Traditional Wrestling & Pankration Association (AMTWPA) ka sngew sarong ban pynbna ba ka kynhun ki nongïalehkai ki la ïoh ban rah ïa ka nam lahduh ha ka jingïalehkai Pankration ka ba lah jer kyrteng thymmai da ka Amateur Mixed Martial Arts (AMMA) ha ka lympung ‘13th All India Traditional Wrestling and Pankration Championship’.
kane ka Championship kaba ar sngi lynter ka la long ha ka 08 tarik bad 09 tarik Kyllalyngkot, 2026 ha Peddem, Badminton Hall ha Mapusa, Goa, bad la pynïaid ïa ka da ka All Goa Traditional & Pankration Association (AGTW&PA) hapoh ka jingpeit jong ka All India Traditional Wrestling & Pankration Federation.
Ha kane ka 1st Amateur Mixed Martial Arts National Championship ka kynhun ki nongïalehkai ka Meghalaya ki lah ïoh khur haduh 25 tylli ki takma ba kynthup ïa 9 tylli ki ksiar, 7 tylli ki rupa bad 9 tylli ki rnong, ban pynthikna ïa ka ‘Champion Team Trophy’ ha poh ka Ri India ha ka Amateur Mixed Martial Arts (Elite Pankration).
Ka kynhun jong ka Karnataka AMMA Association ka la bud ha ka kyrdan ba ar, nangta ka Rajasthan AMMA Association ka la pyndep ha ka kyrdan ba lai.
Nalor kane ka jingjop, ka kynhun ka la wan kyrdan Ba-ar (1st Runner’s Up Team Trophy) ha ki jingïalehkai Traditional Sports kum ka Mas-Wrestling, Belt Wrestling & Naga Wrestling, kaba la pynlong ha ka sien ba nyngkong eh ha ka 10 bad 12 Tarik , Kyllalyngkot, 2026.
Ha kane ka jingïalehkai pat ki la don kumba 1,500 ngut ki nongïashim bynta na kylleng ka ri India.
ïa ka nam lahduh la rah da ka Maharashtra Traditional & Wrestling Team bad bud pat da ka Meghalaya T/Wrestling Team kum ka 1st Runner’s Up bad ka Haryana T/Wrestling Team ha ka kyrdan balai.
Na ka liang jong ka kong Anita Songthiang-President jong ka AMTWPA, ka la pynpaw ïa ka jingsngewkmen halor kane ka jingjop don burom jong ka kynhun kaba la thaw ïa ka history ban pynlong ïa ka Meghalaya Amateur Mixed Martial Arts kum ka Lahduh ha ka ri kaba bun ki ju tip ïa ka MMA tang kum ka rynsan Professional Fight ym kum ka National Championship.