Shillong, Nohprah 15: Ka Mawsynram kaba la mihkhmat ïa ka East Khasi Hills ka la long kaba seisoh tam ha ka lympung ïalehkai softball da kaba rah ïa baroh ar tylli ki khusnam lahduh jong ki shynrang bad kynthei ha ka 4th Senior Softball State Level Championship 2024 ba la poi sha kaba kut ha ka 14 tarik Nohprah (sngi Saitjaiñ) jong ka taïew ba ladep.
Ka jingïakhun final kaba nyngkong la sakhi ïa ki thei ïalehkai ka Mawsynram kiba la pynliem noh ïa ka Mupliang kaba mihkhmat ïa ka West Jaintia Hills, ban knieh ïa ka burom lahduh na katei ka kynhun kaba la rah ha u snem ba ladep.
Katba ha ka liang ki shynrang, ka Mawsynram ka la ïai bteng ban bat dalade ïa ka nam kum ka lahduh da kaba pynliem biang sa shi sien ïa ka Dkhiah kaba na East Jaintia Hills ban rah saw sien lynter ïa kane ka Championship.
Kumban shu pynkynmaw, ka jingïakhun final ha u snem 2023 ka la long hapdeng kine ki ar liang mamla. Mynta ka kynti ka Mawsynram ka la lah ban pynkut ïa ka jingïalehkai da kaba lamkhmat haduh 10 ron tang hapoh ka inning kaba saw ban rah ïa ka namlahduh.
Hane ka sngi la wan kongsan da u Myntri ka tnat jngohkai jong ka Sorkar Jylla – u Bah Paul Lyngdoh bad la pdiang burom da u President ka synjuk (MSA) – u Dr Aman War, ha ka jingïadon ryngkat ki dkhot nongkitkam jong ka Meghalaya State Olympic Association (MSOA) – kata u Working President Bah John F Kharshiing bad General Secretary Bah Finely L Pariat.
Nalor ki khusnam lahduh sha ki kynhun, la ïoh ruh ban sam ïa ki khusnam sha ki rang bad thei ïalehkai kiba kynsai. ïa ka nam ‘Best Catcher’ la khur baroh da ki nongïalehkai ka Mawsynram, ha kaba ka Philawanbiang Syiemlieh ka la ïoh ha ka liang ki kynthei katba u Nangkiewkupar Disiar ha ka liang ki shynrang.
Nangta ïa ka ‘Best Hitter’ ruh la khur da ki nongïalehkai ka Mawsynram, ka Eliza Lyngdoh na ki kynthei, katba u Sandy Stone Kharchandy ha ka liang ki shynrang.
Ha kawei pat ka liang, ïa ka nam ‘Best Pitcher’ la khur da ka Larishisha Phawa jong ka Mupliang ha ka liang ki kynthei bad u Krishna Thapa jong ka Dkhiah naki shynrang.
Baroh ki don hynñiew tylli ki kynhun shynrang bad kynthei ba ïashimbynta (nalor ki kynhun ba poi sha ka final) kiba mihkhmat ïala ki jong ki District: kine ki long ka Nongpoh na Ri-Bhoi, Mawkyrwat na South West Khasi Hills, Nongstoin na West Khasi Hills, bad ka Mairang na Eastern West Khasi Hills.
ïa kane ka Senior Softball State Level Championship la pynlong da ka Meghalaya Softball Association (MSA) ha ryngkat ka jingkyrshan na ka tnad Sports jong ka Sorkar Jylla, bad ïa ki jingïalehkai naduh ka league stage haduh ka final la pynlong ha St Anthony’s Higher Secondary School Stadium.
ïa kane ka 4th Senior Softball State Level Championship 2024 la wan plie pyrda da u Fr Anthony Kharkongor – Principal jong ka St Anthony’s Higher Secondary School, u ba la don ryngkat ruh ha katei ka sngi pynhap pyrda.
