Shillong, Risaw 02: Ka Mawryngkneng SC ka la ïoh ban poi sha ka thong ban long lahduh ha ka phutbol kyrdan Third Division 2024 jong ka Shillong Sports Association hadien ba ka la pynliem ïa ka Umpling SC da 3-2 kol ha ka jingïakhun final kaba itynnat bha ha SSA Ground, Polo, ha ka Sngi Balang.
Ha ka jingïakhun, ka Mawryngkneng ka la ïoh ban lamkhmat ïa ka kylla step da shi kol, kane ka la wan lyngba ka penalty ha ka minit ba 32 ba la thep da u Kamphylla Dkhar.
Hadien katei ka shi kol, ka Umpling ka la ïakynduh mawsiang biang tang mar ïa sdang ka kylla miet, ha kaba ka Mawryngkneng ka la ïoh ban pynkhih sa ïa ka kol kaba ar. Ka jingbymlah ban tehlakam u Arvinson (rangapkol ka Umpling) ban khanglad ïa ka bol, ka la plielad ïa u Banker Mynsong ban thep suk jai ïa ka kol kaba ar ha ka minit ba 46.
Ka Umpling ka la ïohlad ban pynphai shi kol lyngba u Mebankitdor Nongkynrih ha ka minit ba 72, hynrei ka Mawryngkneng ka la pynskhem biang ïalade lyngba ka kol na u Mebanwell Kharsati (76 minit).
Hadien 10 minit duna shuwa ban kut ka por, ka Umpling ka la ïoh penalty, ba la shimti da u kapten ka kynhun, u Larrykupar Kharnaior (83 minit) u ba khlem pynsepei ïa ka kabu ban pynkhih ïa ka kol kaba ar, hynrei ka por ka lyngkot eh ka kynhun ban wanphai.
Da kane ka namjop ka Mawryngkneng ka la ïohrah ïa ka trophy ryngkat ka song khusnam ba 80,000 na u Bah Danny Pariat jong ka Shillong Recreation Ground Trust, kaba kyrshan ïa kane ka lympung Third Division. ïa ka trophy la aiti da u Bah Banteidor Lyngdoh, President ka SSA. Katba ka Umpling ka la ïohpdiang ïa ka song tyngka kaba 40,000 kum ka kynhun ba wan kyrdan ba ar.
Nalor ka kynhun lahduh, la sam khusnam ruh sha ki rangïalehkai ba kynsai, ha kaba u Mebalabiang Myrboh, kapten jong ka Mawryngkneng u la khur ïa ka ‘ Player of the Match’ ha kane ka jingïakhun final, bad ki la don lai ngut ki rangïalehkai ba ïoh thep bun kol, u Banker (Mawryngkneng), u Dekoster Nongrum bad u Kordinus Kharkongor jong ka Mawpat, kiba la ïoh thep mar san kol.
Kumta, baroh ar ki kynhun ba ïakhun ïa ka final bad ar tylli ki kynhun ba la khyllem noh ha ka semi final, ba kynthup ïa ka Mawpat SC bad ka Tynring SC, ki la kiew kyrdan ban ïakhun ha ka SSA Second Division na bynta u snem 2025.
