Shillong, Nailar 22 : Ka kynun ïalehkai ka Mawmer Wahlyngkhat ka la rah ïa ka nam lahduh jong ka jingïalehkai kynjatbol kaba ai kyrteng ka Independence Cup kaba la pyllong ka All India Trinamool Congress (AITC) Pynursla Mandal.
Ka Mawmer Wahlyngkhat ka la pynliem ïa ka BOB Lyngkyrdem da tie-breaker hadien ba ka jingïakhun ha madan ka la ïakhaid 1-1.
Ka lahduh ka la khur ïa ka song pisa kaba T. 30 hajar bad ka khusnam katba kaba long baar ka la khur T. 15 hajar bad ka khusnam.
Ha kane ka jingïalehkai la wan iashim bynta 32 tylli ki kynhun ïalehkai na ka thaiñ Pynursla Constituency.
Shwa ïa kane, la don ka jingkren pynshai na ki nongïalam ka seng kynthup na u Bah Edmund Khongngai, u Bah Harold Khongsit u kyrtong na Sohra, u Bah Dominic Wankhar uba peit ïa ka East Khasi Hills bad kiwei.