SHILLONG, Nailar 14: Ka kynhun ïalehkai Wushu jong ka jylla Manipur ka la long ka lahduh ha ka Khelo India Women’s League East Zone Wushu Championship ba la pynlong da ka Meghalaya Wushu Association (MWA) ha NEIGRIHMS Indoor Stadium, Shillong kaba la jam sha kaba kut ha ka 12 tarik Nailar, 2024.
Kum ban shu kdew, la pynlong ïa kane ka Championship da ka MWA ha ryngkat ka jingkyrshan na ka Wushu Association of India (WAI) ba la aibor da ka Sport Authority of India (SAI) bad la sdang ïa ka naduh ka 9 tarik haduh 12 tarik Nailar, 2024.
Mynta u snem la sakhi ïa ka jingwan ïashimbynta palat 600 ngut sha kane ka Championship kaba la long ha Shillong, kine ki nongïalehkai ki kynthup ïa kiba la wan na 10 tylli ki Jylla kiba hap hapoh ka jylli jong ka East Zone.
Ha ka sngi pynhap pyrda la wan Kongsan da I Madam Idashisha Nongrang (IPS), Director General of Police, kaba la ai mynsiem bad pynshlur ïa ki Kynthei baroh ban long ki ba minot bad ban trei shitom na ka por sha ka por khnang ba kin lah ban wanrah nam ha ki kyrdan bapher bapher na ka bynta ka Ri baroh kawei.
Kiwei pat kiba la don ryngkat ha kane ka sngi pynkut ki kynthup ïa u T.S Chauvan, Dy.Director SAI (Regional), u Bah Mairom Kharkrang (IPS) Retd, u Bah Thomas Passah Retd. Wing Commander ka Air Force mynta kum U Working President ka Khun U HynniewTrep National Awakening Party (KHNAM), nangta ki dkhot ka Wushu Association of India, Muraly Choudhury, Treasurer ka WAI, Suheil Ahmed Chief Adviser Secy.WAI, Donny Raphael Ranee-President Meghalaya Wushu Association (MWA) lem bad kiwei kiwei.
Ka Meghalaya Wushu Team kaba dang pynrung thymmai ïa ki Kynthei ïalehkai haduh kumba 80 ngut na Tura, Nongstoin ,West Jaintia, East Jaintia, Ri-Bhoi bad East Khasi Hills ka la lah ban ïoh tang kumba 10 tylli ki takma ha kane ka Championship.
Kumba la kdew ha neng, ka Manipur kaba long ka lahduh ka la ïoh khur ïa ka Champion Trophy, katba ka Assam ka la bud nadiem ka la khur ïa ka 1st Runner’s – Up Trophy, nangta ka Bihar Wushu Team ïa ka 2nd Runner’s-Up trophy.
