Jowai, Jymmang 29: Ka Maitchaphrang Mootyr-chiah kala long kum ka lahduh ha ka lympung ïalehkai ba la tip kum ka ‘2nd Adelbert Laloo Memorial Trophy’ ha ka kyrdan 3rd Division Tournament-2022, ïa kaba la pynïaid da ka West Jaiñtia District Sports Association (WJDSA) ha madan Kiang Nangbah Stadium Dongmihsngi Jowai.
Ïa kane kane lyngpung la pynlong shi bynta na ka jingrakhe dap 50 snem ka Association bad ha kane ka sngi pynhap pyrdan la wan sakhi da u kongsan ma Khroobok Passah uba dei ruh u District Sports Officer, ha ka jingdonlang u ma E.M.H Passah kum u symbud kongsan, ma S.K Lato, Dr. H.H. Mohrmen, ma M.M Thaiang, ki nongkitkam ka WJDSA bad kiwei de.
Ka Maitchaphrang Mootyrchiah kala long kum ka lahduh haddien ba ka la lah ban pynliem ïa ka Khliehmuchut Shangpung da 2-1 kol, haba phai sha ka jingïakhun hapdeng kine ki ar kynhun kala long kaba itynnad bad kaba ïakhait bha naduh ka jingïakhun jong ka kylla step haduh ka kylla miet.
Haka kylla step kine ki kynhun kila ïoh ban thep kol mar kawei, katba ka jingïakhun ka dang sdang ta kumba 4 minit u Sanborlang Tang u rangïalehkai jong ka Maitchaphrang Mootyr-chiah ula thep ïa katei ka kol ba nyngkong, katba Khlieh-muchut Shangpung kala pyrshang ban pynphai ïa katei ka shikol bad dei ha ka minit ba 14 kala ïoh ban pynkhih ia ka jar lyngba u Arwan Phadong.
Ha kaba wan ban bteng ïa ka jingïakhun jong ka kylla miet ka jingïalehkai kala long kaba kham itynnad shuh shuh namar baroh kitei ki ar kynhun kila sei pyrthei ïala ki sap ki phong ïalehkai jong ki hapoh madan kaba la pynhun ïa ki nongkyrshan bad ïa baroh kiba la wan sakhi ïa ka jingïalehkai phainal.
Dei ha ka minit hashwa ban kut noh ka jingïakhun kata ha ka minit ba 79 u rangïaleh jong ka Maitcha-phrang Mootyr-chiah u Risanlang Dkhar ula ïoh ban thep ïa katei ka kol ba ar kaba la pynlong syndon ïa ka kynhuh Maitchaphrang Mootyrchiah ban long syndon kum ka lahduh jong kane ka lympung mynta ka snem ha ka kyrdan 3rd Division bad haka juh ka por kine baroh ar kynhun kiba la poi phainal kila ïoh rung sha ka kyrdan 2nd Division.
Ïa ki khusnam sha ki nongjop la sam da u kongsan bad u symbud kongsan jong kane ka sngi, ka kynhun ba ïoh ïa ka nam lahduh kala ïoh rong ia ka song pisa kaba 25 hajar tyngka lem bad ki Trophy bad ka kynhun ba wan ba ar kala ïoh 12 hajar tyngka lem bad ka trophy.
Katba ïa ka nam Best Goalkeeper la ïoh da u Damiki Tyngkan na ka Mookyrdup, Top Scorer ar ngut kiba la theh mar 8 kol kita ki long u Dangri Phawa ka Madankynsaw Mookyn-deng bad u Risanlang Dkhar ka Maitchaphrang Mootyr-chiah, ïa ka nam Man of the Match la ïoh da u Sanborlang Tang ka Maitchaphrang Mootyrchiah. Ka nam Player of the Tournament la ïoh da u Risanlang Dkhar ka Maitchaphrang Mootyrchiah.
