Jowai, Naiwieng 10: Ka kynhun ïalehkai jong ka Madan Thadmuthlong SC kala long ka lahduh haka lympung ïalehkai phutbol jong ka kyrdan 13th Chatister Kharkongor Memorial Trophy 1st Division Football Tournament-2025 bala pynïaid daka West Jaiñtia District Sports Association (WJDSA) kaba la pynlong ha kane ka sngi saitjaiñ ha madan Kiang Nangbah Stadium Dongmihsngi, Jowai.
Haba phai sha ka jingïakhun Final naka liang ka kynhun jong ka Madan Thadmuthlong SC kala pynliem da 2-1 kol ïaka Dulong SC, ïa kitei ki kol naka Madan Thadmuthlong SC la thep da u Iaineh Suchiang haka minit ba 20 bad u Mebanshan Kharsahnoh haka minit ba 91. Katba ïa ka shikol na ka Dulong SC la thep da u Sahame Lyngdoh haka minit ba 56.
La sam ruh ïa ki khusnam shimet, ha kaba ïa ka nam Man of the Match la ïoh rah da u Mebanshan Kharsahnoh na ka Madan Thadmuthlong, Best Goal Keeper la ïoh da u Ebormi Pohplet na ka Dulong SC, Top Scorer la ïoh da u Sahame Lyngdoh na ka Dulong SC bad ka nam Player of the Tournament la ïoh da u Precious Tang na ka Madan Thadmuthlong.
